اسلام آباد۔ 20 اپریل (اے پی پی) متحدہ عرب امارات، ابوظہبی فنڈ آن پاکستان ءِ تروک آ 2 ارب ڈالر ”کمکی وام“ نا پدی تننگ نا مد اٹی ودکی نا فیصلہ ءِ کرینے۔ داہیت ءِ اماراتی وزیر خارجہ تینا پاکستانی ہم منصب مخدوم شاہ محمو دقریشی تون تدوک آدے اوڑدہی ٹی پارے۔ سے شنبے نادے آ ترجمان دفترخارجہ نا رداٹ اماراتی وزیر خارجہ شیخ عبداللہ بن زاید النہیان وزارت خارجہ، متحدہ عرب امارات آ بننگ آ تینا پاکستانی ہم منصب ءِ جم و جوش اٹ بخیر کرے۔ اماراتی ہم منصب شیخ عبداللہ بن زاید النہیان تون اوڑدہی ٹی ہڑتوم آ کنڈآتا تعلقداری، کثیر الجہتی بشخ آتے ٹی ہڑتوم آ کنڈآتا کمکاری ءِ مون آ دننگ تون اوار اہم علاقائی و جہانی امور آ گپ وتران کننگا۔ ہڑتوم آ وزیر خارجہ غاتا نیام اٹ واپار، زرکاری، انفراسٹرکچر ڈویلپمنٹ، توانائی، ٹیکنالوجی، سیل و سوات و افرادی قوت تون اوار تین پہ تینی است خواہی نا بشخ آتے ٹی ہڑتوم آ کنڈآتا کمکاریءِ ودفنگ نا بابت سرجم گپ وتران مس۔ وزیر خارجہ ایکسپو2020دبئی ٹی پاکستانی پویلین نا ٹہیفنگ اٹ اماراتی حکومت نا پبی کمکاری آ، اماراتی وزیر خارجہ نا منت واری ءِ ہرفے وخت اس کہ اماراتی وزیر خارجہ وزیر خارجہ مخدوم شاہ محمود قریشی ءِ پارے کہ متحدہ عرب امارات، ابوظہبی فنڈ آن پاکستان ءِ تروک آ 2 ارب ڈالر”کمکی وام“ انا پدی تننگ نا مد اٹ ودکی نا فیصلہ ءِ کرینے۔ وزیر خارجہی دا خیرخواہی گام آ اماراتی وزیر خارجہ نا منت واری ءِ ہرفسا، اودے پاکستان و یواے ای نا نیام اٹ ودوک آ ہڑتوم آ کنڈآتا تعلقداری نا درشانی گوندا۔ یات سلے کہ پاکستان ءِ ابوظہبی فنڈ آن ملوک آ اِراارب ڈالر کمکی وام نا زرتس، 19اپریل 2021اسکان کننگ ئس۔ شاہ محمود قریشی پارے کہ پاکستان، اینخو سال، اکتوبر اٹی گمانی”دبئی ایکسپو2020“ اٹی پبی بشخ ہلیک و داایکسپو نا کمک اٹ دنیا نا چکار، پاکستان نا تاریخ، جغرافیائی اہمیت، تہذیب و تمدن و پاکستان اٹی کاروبار و سیل و سوات نا میسر وسیع وارخواہی تا کنڈآ مبذول کرفنہ۔ وزیر خارجہ کورونا دین اٹی، یواے ای ٹی رہینگوک آ پاکستانی کمیونٹی نا کمکاری ءِ کننگ و پاکستانی ورک فورس انا خصوصی خیال تخنگ آ اماراتی وزیر خارجہ و متحدہ عرب امارات نا سرکڑدہ نا منت واری ءِ ہرفے۔
