لاہور۔ 20اپریل (اے پی پی) لاہور ہائی کورٹ روچہ بازار و یوٹیلیٹی اسٹور تیا دمدستی وڑاٹ لین تے چٹفنگ و اینو (چارشنبے اسکان) عملدرآمد رپورٹ پیش کننگ نا پرمان کرے۔ لاہور ہائی کورٹ نا جسٹس شاہد جمیل خان شوگر ملز انا اسہ وڑنا جتاجتا درخواست آتیا سماعت کرے ہراٹی سرکاری وڑاٹ شوگر مل آتیان 80 روپئی کلو نا حساب اٹ بور ہ ہلنگ نا پرمان تے چیلنج کننگا۔ فاضل عدالت استفسار کرے کہ پرچون نا دوکان تیا بورہ اخہ روپئی آ اسہ کلو ملنگ ءِ ہراڑآ سرکاری وکیل ورندی تس کہ پرچون دوکان تیا 85 و روچہ بازار اٹی 65 روپئی کلو بورہ تننگ انگ ءِ۔ عدالت پارے کہ بورہ نا فراوانی و نہاد آتیا عملدرآمد کرفنگ نا اختیار پنجاب حکومت نا ءِ،نی گیند ءِ اسہ ایلو نا کورٹ اٹ خسسا خلاص مفننگ کپیسہ۔ داکیس اٹ ویل ریگولیشن نا ءِ۔ حکومت اخس نہاد پارے عدالت اودے مقرر کرے۔ لس بازار تیٹی تخوک آ نرخ آتیا بورہ ملپننگ ءِ، حکومت پرچون نا کہول آ بورہ غاتا تخوک آ نرخ آتیا فراوانی ءِ پک کے۔ سرکاری وکیل عدالت ءِ پارے کہ پرچون نا کہو ل آ بورہ فراوان کننگ انگ ءِ۔ روچہ بازار تیٹی مخلوق نا لین لگپننگ ءِ، مخلوق ءِ کرسی تیا تولفسا بورہ تننگ انگ ءِ۔ عدالت پارے کہ انتئے کہ دا معاملہ غا لوکل کمیشن اس مقرر کننگے۔ اگہ نا ہیت غلط مس تو توہین عدالت نا کارروائی کن تیار مریس۔ فاضل عدالت الس ءِ بورہ نا فراوانی ءِ پک کرسا تعلقدار زموارآتیان اینو چارشنبے آ رپورٹ ءِ پیش کننگ نا پارت کرے۔
