اسلام آباد۔ 20اپریل (اے پی پی) ملک اٹی بجلی نا پیدوار نا بشخ اٹی براہ راست زرکاری ٹی برجامالی سال انا اولیکو 9 تُو اٹی تدوک آ مالی سال انا مقابلہ ٹی زرس کمتی ریکارڈ کننگانے۔ اسٹیٹ بینک و زرکاری بورڈ انا کنڈآن دا بابت جاری کروک حساب وکتاب نا رداٹ جولائی آن ہلیس مارچ 2021اسکان نا مد اٹی ملک اٹی بجلی نا پیدوارنا بشخ اٹی 737.8مین ڈالر نا براہ راست زرکاری مسنے ہرا تدوک آ مالی سال انا ہند امد انامقابلہ ٹی 0.62درسد کم ءُ، تدوک آ مالی سال انا ہندا مد اٹی ملک اٹی بجلی نا پیدوار نا بشخ اٹی 742.4ملین ڈالر نا برہ راست زرکاری مسوسس۔ حساب وکتاب نا رداٹ مارچ اٹی ملک اٹی بجلی نا پیدوار نا بشخ اٹی 138.9ملین ڈالر نا زرکاری ریکارڈ کننگانے۔ دیر آن بجلی ودی کننگ نا ڈٹ آتے ٹی برجامالی سال انا مسہ سہ ماہی تیٹی 136.7 ملین ڈالر نا زرکاری مس۔ تدوک آ مالی سال انا ہند امد اٹی دا بشخ اٹی 116.2ملین ڈالر نا براہ راست زرکاری ریکارڈ کننگاسس۔ ایندھن آن بجلی ودی کننگ نا ڈٹ آتے ٹی براہ راست زرکاری نا کچ 144.8ملین ڈالر ریکارڈ کننگا، تدوک آ مالی سال انا ہند امد اٹی ایندھن آن بجلی ودی کننگ نا ڈٹ آتے ٹی 79.6ملین ڈالرنا براہ راست زرکاری ریکارڈ کننگاسس۔ کولاآن بجلی ودی کننگ نا ڈٹ آتے ٹی برجامالی سال انا اولیکو 9 تُو اٹی 456.3ملین ڈالر نا براہ راست زرکاری مس، تدوک آ مالی سال انا بنائی مسہ سہ ماہی ٹی کولاآن بجلی ودی کننگ نا ڈٹ آتے ٹی 546.6ملین ڈالر نا براہ راست زرکاری ریکارڈ کننگاسس۔
