اسلام آباد۔ 20اپریل (اے پی پی) کوویڈ۔ 19 نا جہانی دین آن نیزگار ملک آتے بھلو زرگزرانی بھاریم اس مون تروک ءِ، کم کٹیا کروک آ ملک آک دا بھاریم ءِ سگنگ نا وس تخپسہ۔ جہانی مالیاتی فنڈ(آئی ایم ایف) تینا اسہ بلاگ اسے ٹی پارینے کہ مچ آ دنیا نا حکومت آک الس و کاروباری و صنعتی ادارہ غاتے تنخواہ تا زرتس اٹی سبسڈی، بے روزگار الاؤنس اتون اوار ایلو مالیاتی گام گیج کننگ ءِ۔ جان جوڑی نا آسراتی، تعلیم و بنداوی السی خذمت نا فراوانی کن پین گام گیج آتا گرج ءِ۔ آئی ایم ایف جہانی برادری ءِ خبڑدار کرینے کہ ودوک آ بے بریبری و حکومتی وام تیٹی ودکی نا خطرہ غاتے کم کننگ کن جدت آ مبنی پوسکن آ سوچ انا گرج ءِ و بے روایتی وڑوڈول آن فنڈ آتا دوئی کننگ نا گام گیج المی ءِ تانکہ کورونا دین آن زہمی مروک آ غٹ تپہ غاتے بریبر وسیلہ مہیا کننگ مرے۔ آئی ایم ایف پارینے کہ کم کٹیا کروک آ ملک آتون اوار شون ہلوک ملک آتا حکومت آک کارپوریشن و صاحب استطاعت بندغ آتیان فنڈ یکجا کننگ آ چکارکیر تانکہ یکجا کروک آ ودکی وسیلہ غاتیان دین انا سوب ودوک آ خڑچ آتے پورو کننگ مرے۔ جہانی ادارہ دا بابت سلاہ کرینے کہ زیات آن زیات فنڈ آتا دوئی کننگ کن جارحانہ ٹیکسیشن نا حکمت عملی اس شین تننگے۔ داکان بیدس زرگزرانی بحالی نا گام گیج آتے ترند کننگ نا ہم گرج ءِ۔
