اسلام آباد۔ 19 اپریل (اے پی پی) وزیراعظم عمران خان پارینے خواجہ کریم ﷺ نا ناموس اٹ گستاخی ءِ توننگ کن ای مسلم دنیا نا سروک آتون اواری اٹ دا معاملہ ءِ جہانی کہول آ ہرفیٹ، توڑپھوڑ آن غیر ءِ ہچ اس مفک بلکن نن تینا ہی نسخان ءِ کننگ اُن، پاکستانی قوم تینا دین و خواجہ تون غٹ آن زیات پیار کروک آ قوم ءِ ولے مذہبی جماعت آک بھاز وخت دا جوزہ ءِ ہراوڑ غلط کاریم اٹ اتیرہ اوڑآ افسوز ءِ، مارگلہ ہائی وے و رنگ روڈ انا تفنگ آن ٹریفک نا ویل ایسر مریک، ساڑی حکومت شجرکاری و ماحولیات آ چکار کرے۔ داخیال آتا درشانی ءِ او دوشنبے نادے آ داڑے مارگلہ ہائی وے نا بنداو ءِ تخنگ نا دود آن تران کرسا کرے۔ وزیراعظم دا ڈٹ انابناءِ کننگ آ سی ڈی اے ءِ مبارکبادی تس و پارے کہ دا متکن ءُ ڈٹ اسے ولے مون آ ہِننگ کتو۔، اسلام آباد نا آبادی ٹی تدوک آ 20 سال اٹ کم و ود یک و نیم ہنداخہ پین ودکی مسنے ولے آبادی ٹی ودکی نا تناسب آن انفراسٹرکچر و سڑک جوڑ کننگتو ہراڑآن سڑک آتا ٹریفک نا دباؤ ودانے۔ وزیراعظم پارے کہ رنگ روڈ انا تفنگ جوان ءُ ڈٹ اسے۔ داڑآن ہیوی ٹریفک ءِ شار آن پیشن کشنگ اٹ کمک رسینگک۔ اوپارے کہ اسلام آباد اسہ زیباءُ شار اسے ہرانا جوان ءُ موسم اسے۔ اسلام آباد اٹی لندن نا کچ پِرمریک، مارگلہ ہلز انا سوب آن دا سرسوز و شاداب و زیبائی ءِ و باسنی ہم کم مریک۔ وزیراعظم پارے کہ اسلام آباد نا مخلوق ءِ ماحولیاتی نا بھاز خیال ارے۔ اوپارے کہ ننا حکومت ماحولیات و شجرکاری آ بھاز زیات چکار کرینے۔ مستین اٹ درخت آتے بے تک گڈنگا ولے پوسکن ءُ درخت خلنگتو۔ ہراتم آن پاکستان جوڑ مسنے بیرہ 60 کروڑ درخت خلنگانے۔ کندیاں، چھانگامانگا، دیپالپور، چیچہ وطنی ٹی انگریز آک بھلو جنگل خلکوسر نن پین جنگل خلنگ نا جاگہ غا اوفتے چٹیفینن۔ بروک آ چین تیا دانا منفی زہم مریک۔ ماحولیاتی و موسمیاتی بدلی تیان مچ آ دنیا خوفزدہ ءِ۔ داڑآن باسنی ہم ودنگ ءِ و دیر ہم کم مننگ ءِ۔ پاکستان کن بروک آ وخت اٹی دیر انا ویل بھاز اہم ءِ۔ مصر آن پد ننا ملک ارٹ میکو نمبر آٹے ہراڑے کم دیر ءِ۔ بھارت تون ننا مقابلہ ٹی اِراہنداخہ پین دیر ارے۔ وزیراعظم پارے کہ اونا حکومت انت کہ گام گیج اس کننگ ءِ اوٹی ماحولیات ءِ مون آ تخنگ انگ ءِ۔ اگہ درخت اسے گڈوئی تمک تو اونا جاگہ غا پین درخت خلنگ آ چکار کننگ اُن۔ مارگلہ نیشنل ہلز اینڈ پارک سڑک نا تفنگ آن زہمی مفک بلکن دیوال اس مننگ آن اونا رکھ مریک۔ وزیراعظم پارے کہ مارگلہ ایونیو مننگ آن سیل وسوات ءِ ہم فائدہ مریک، بھارہ کہو ٹی میلہ غاتا ٹریفک جام مریک، لاہور و ایلو علاقہ غاتیان بروک آ ٹریفک کن دا بائی پاس مریک۔ وزیراعظم پارے کہ ننا ملک اٹی بدبختی اٹ بھاز وخت سیاسی و دینی جماعت آک اسلام ءِ غلط کاریم اٹ اتیرہ و تینا ملک ءِ نسخان تننگک۔ غیر آتے ہچ ءُ پرخ اس تمپک ولے توڑپھوڑ آں تینا ہی نسخان مریک۔ وزیراعظم پارے کہ نن غٹ خواجہ کریم ﷺ تون بے کچ مہرومریبت کینہ۔ دا ملک اسلام نا پن آ جوڑ مس۔ دین اتون دانا لگنگ و خواجہ کریم ﷺ تون عشق ہراوڑ پاکستان اٹی ارے، پین ملک اسے ٹی نظر بفک۔ ننا غٹ انا مسخت اسٹ ءِ۔ نن تینا دین و خواجہ کریم ﷺ تون بھاز پیار کینہ ولے دا جوزہ ءِ غلط کاریم اٹ اتنگک ہرااست ہسونی نا سوب ءِ۔
