اسلام آباد۔ 16 اپریل (اے پی پی) وزیراعظم عمران خان سکھر کن روانہ مس۔ وزیراعظم آفس نا میڈیا ونگ آن جاری بیان نا رداٹ بنجائی وزیر شاہ محمود قریشی، ڈاکٹر فہمیدہ مرزا، سید علی حیدر زیدی، اسد عمر، محمد میاں سومرو، خصوصی کمکار ڈاکٹر ثانیہ نشتر، گورنر سندھ عمران اسماعیل و عثمان ڈارئسک اوار ءُ۔ دورہ ٹی سندھ انا 14اولیتی ضلع غاتے کن 446ارب نا میگاشونداری ڈٹ آتا پڑو ءِ کیک۔ وزیراعظم سندھ اٹی برجا بنجائی شونداری ڈٹ آتیا پیش رفت نا ہم جاچ ءِ ہلیک۔ میگا شونداری پیکج نا وت سندھ انا پسماندہ علاقہ و راج انا محروم تپہ غاک ءُ۔ اولیتی ضلع غاتے ٹی بدین، حیدر آباد، لاڑکانہ، ٹنڈواللہ یار، دادو، جیکب آباد، میر پور خاص، ٹنڈو محمد خان، گھوٹکی، خیرپور، نوشیروفیروز، سانگھڑ، شکارپور وسکھر اوار ءُ۔ شونداری ڈٹ انا رداٹ 306 کلومیٹر سکھر حیدر آباد موٹروے آن مچ آ ملک انا مسافر آک فائدہ ہرفرہ۔ ڈٹ انا رداٹ ریلوائی اسٹیشن تے اپ گریڈ کننگک داڑآن نجی زرکاری بریک و مسافر آتے آسراتی رسینگک، توانائی نا ڈٹ آتیان بجلی دُزی و نسخان آتے ٹی کمتی بریک، 30ہزار سالانہ پوسکن کنکشن تننگک و بروک آ مسہ سال اٹی 26 ارب اسکان کٹیا تیٹی ودکی مریک۔ 1490کلومیٹر انفراسٹرکچر نا بحالی آن گیس انا بے سلنگ آن سپلائی ممکن مریک۔ خلق آتے گیس فراوان کننگک ہراڑآن 5074اُرا فائدہ ہرفرہ۔ پوسکن آ گج ڈیم آن 28800ایکڑ 160رقبہ سیراب مریک۔ نکاسی آب انا نظام گھوٹکی ضلع نا دہائی تیا متکن ویل ءِ ایسر کیک۔ ماحولیاتی نظام نا گچینی آن اِرالکھ ایکڑ نا بحالی و ہزار آ مخلوق ءِ روزگار نا وارخواہی دوبریک۔ ڈٹ انا رداٹ عاقل اگنی لوپ بند انا سوگوی موہنجودڑو نا تاریخی ہند ءِ پین سوگو کننگ نا سوب مریک۔ وزیراعظم نا ورنا پروگرام نا رداٹ اسہ ہزار ورناتے 4.8ارب نا وام تننگک، ڈیجیٹل سکل ٹریننگ پروگرام نا رداٹ 104617طالب علم آتے تربیت فراوان کننگک وخت اس کہ 52 درسد نا ہائیر ایجوکیشن اسکان رسینگ ممکن مریک۔ اسہ لکھ 30 ہزار ورنا بشمول 35 ہزار طالب علم آتے گوازی تا آسراتی فراوان کننگک۔ نادرا این آرسیز نا کمک اٹ 50 لکھ ہندی بندغ فائدہ ہرفرہ۔ 14 پاسپورٹ دفتر آتا اپ گریڈیشن آن 2 لکھ بندغ ءِ پاسپورٹ نا دوئی کننگ نا آسراتی دوبریک، ہائی سپیڈ 3 جی و 4 جی نا آسراتی آن 37 لکھ انا آبادی فائدہ ہرفک۔ 12لکھ بندغ آپٹیکل فائبر کیبل نیٹ ورک آن فائدہ ہرفرہ۔
