سکھر۔ 16 اپریل (اے پی پی) وزیراعظم عمران خان پارینے کہ اندرون سندھ اکن پورو تیاری اتون اسہ بھلو پیکج اس ایسونن، اندرون سندھ انا مخلوق شونداری ٹی پدی سلیسنو، گچین کاری تیٹی پنجاب اٹی اسہ بھلو مافیا سے تون مقابلہ ئس ہنداخاطرآن اندرون سندھ آ زیات چکار کننگ کتوٹ، ورناتے بے سود آن وام ترسا تینا نت تینا سلفنہ، سکھر حیدر آباد موٹروے، پوسکن آ گج ڈیم انا تفنگ آن علاقہ ءِ بھلو فائدہ اس مریک۔ احساس ایمرجنسی کیش پروگرام نا دنگ ءِ اسہ کروڑ 20 لکھ خاہوت اسکان ودفینہ، سندھ حکومت کراچی نا خڑک پوسکن آ شار جوڑ کننگ نا ڈٹ انا این او سی ءِ کینسل کننگ نا فیصلہ غا نظر ثانی کے، داڈٹ آن سندھ ءِ فائدہ مریک، پسماندہ علاقہ و شیفکو تپہ غاتے ہرفنگ نا کوشست کننگ اُن، سندھ انا الس نا حالیت آتے بدل کننگ کن پورو کوشست کینہ۔ داخیال آتا درشانی ءِ او جمعہ نادے آ داڑے سندھ انا 14اولیتی ضلع غاتے کن 446 ارب روپئی نا میگا شونداری ڈٹ انا رداٹ سرسہب ورنا پروگرام نا دود آن ترا ن کرسا کرے۔ داوخت آ گورنر سندھ عمران اسماعیل، بنجائی وزیر اسد عمر، ڈاکٹر فہمیدہ مرزا، شاہ محمود قریشی، سید علی حیدر زیدی، محمدمیاں سومرو، خصوصی کمکار ڈاکٹر ثانیہ نشتر و عثمان ڈار ئسک ہم ساڑی ئسر۔، وزیراعظم عمران خان پارے کہ اودے اینو سندھ آ برسا بھاز خوشی مسنے، او کراچی نا دورہ ءِ کرسا کرے ولے اندرون سندھ بننگ نا موقع ملنگ کتو۔ اوپارے کہ اندرون سندھ انا علاقہ نیزگار انگا علاقہ غاتے ٹی شمار مریک۔ 25 سال مست ہراتم ای سیاست نا بناءِ کریٹ و ملک انا چندی علاقہ غاتیا ہناٹ تو بلوچستان، قبائلی علاقہ و اندرون سندھ انا مخلوق آتے بھاز مشکل حالیت آتے اٹ خناٹ۔ الس ءِ بنداوی آسراتی و حق دوئی اف او پولیس و زوراک آتا ظلم و انتقامی کارروائی تا گواچی ءُ۔ موہنجوداڑو 5 ہزار سال متکن ءُ شار اسے ولے اندرون سندھ انا دا علاقہ شون ہلنگ نا جاگہ غا پسماندگی نا کنڈآ ہِننگ ءِ۔ اندرون سندھ انا مخلوق شونداری ٹی پدی سلیسنو۔ وزیراعظم پارے کہ 2018ء نا گچین کاری تیٹی اوفتا پنجاب نا اسہ بھلو مافیا سے تون مقابلہ ئس ہنداخاطرآن او اندرون سندھ آ زیات چکار کننگ کتو۔ اوپارے کہ ننا حکومت بس تو ملک آ تاریخ نا غٹ آن بھلا وامک ودا سر۔ دونیم سال اٹی نن 35 ہزار ارب نا زر وام تا قسط آتا زرتس اٹی تسن۔ ن لیگ دونیم سال اٹی 20 ہزار ارب نا وام پدی تسوسس۔ ہنداوڑ نن ن لیگ نا مقابلہ ٹی ودکی 15 ہزار ارب روپئی وام تا قسط و سود انا زرتس اٹیتسن۔ اگہ نن دا پیسہ غاتے سڑک، اسکول، ہسپتال، آبپاشی نا نظام و انفراسٹرکچر ءِ گچین کننگ آ خڑچ کروسن تو ملک ہراکان ہرانگ ہناکہ ولے وام تا مش ننا مون آ سلوک ئس و ننا بھاز انگاپیسہ غاک دا مد اٹی خرچ مسر اوکان پد ننتون داخہ پیسہ الوکہ کہ الس نا شونداری و آسودہی ڈٹ آتے کن خڑچ کروسن۔ وزیراعظم پارے کہ اندرون سندھ انا الس کن 446 ارب روپئی نا پیکج اس بھلو مشکل حالیت اسے ٹی تیار کرینن۔ پورو تیاری اتون پورو پیکج اس ایسونن، اسہ تُو اٹی دا پیکج آ عملدرآمد نظر بریک۔ وزیراعظم پارے کہ ورناتے کسبکار کننگ اُن۔ ننا ملک انا بھاز بھلو آبادی اسے و 60 درسد آبادی 30 سال آن کم وئی ان ورناتیا تالان ءِ۔ ولے ورناتا بھلا آبادی نا فائدہ ہموتم آٹے ہراتم اوفتے کسب ہیل تننگ کین۔ ورنہ دا بھاریم اس مریرہ۔ پاکستان نا ہرا علاقہ غاک شونداری ٹی رہینگانو اوفتا کمک ءِ کینہ، سویلی بلوچستان کن ہم نن پیکج تسونن۔ مسکوہی قبائلی ضلع غاتیکن ہم بھلو زر اس تسونن۔ مچ آ پاکستان اٹی محروم و شیفکو تپہ غاتے مونی دننگ کن کوشست کننگ اُن۔ سندھ انا الس نا حالیت ءِ بدل کننگ کن تینا پورو کوشست ءِ کینہ۔ وزیراعظم سرسہب ورنا پروگرام نا رداٹ ورناتے ٹی چیک بشخا۔
