اسلام آباد۔ 16 اپریل (اے پی پی) وزیراعظم نا خصوصی کمکار سیاسی امور ڈاکٹر شہباز گل پارینے کہ اشرافیہ و وڈی خور حکمرانک ملک انا غٹ آن زیات نسخان کریر، سندھ اٹی 14 سال آن اسہ خاہوت نا لٹ و پل ترندی آٹے، الس ءِ جان جوڑی، تعلیم و دیر کون آآسراتی دوئی اف، وزیراعظم عمران خان نا دورہ سندھ آن ہموجاگہ نا الس ءِ ریلیف فراوان کننگ اٹ کمک رسینگک۔ داخیال آتا درشانی ءِ او جمعہ نادے آ داڑے میڈیا تون گپ وتران کرسا کرے۔ اوپارے کہ وزیراعظم نا وژن نیزگار الس ءِ ریلیف فراوان کننگ ءِ، وزیراعظم ہراقول آتے کریسس اینو اسٹ اسٹ کرسا اوفتے پورو مننگ ءُ، 50 لکھ اُراتیا کاریم بناکرینے، اسٹ اسٹ کرسا حکومت نا پروجیکٹ پورو مننگ ءِ۔ اوپارے کہ وزیراعظم نا اولیت ملک انا اختہ تپہ ءِ، اشرافیہ ملک ءِ بھس کرے و طاقت ءِ کاریم اٹ ایس، اشرافیہ و کرپٹ حکمرانک غٹ آن زیات ملک ءِ نسخان تسر۔، اوپارے کہ وزیراعظم عمران خان دورہ سندھ اٹی ہموجاگہ نا الس نا ریلیف کن گام گیج آتا پڑو کرے، سندھ اٹی خور اٹی کمتی نا سوب زالبول آک نزوری و چناک خور انا کمتی نا گواچ ءُ۔ اوپارے کہ شکارپور، بدین، ٹھٹھہ تون اوار چندی علاقہ غاتے ٹی کچک نا ہلنگ نا ویکسین دوئی اف، سندھ انا الس جان جوڑی، تعلیم و دیر کون آ بنداوی آسراتی تیان محروم ءُ، وزیراعظم عمران خان ہموجاگہ نا الس نا ویل آتا ایسری کن سندھ انا دورہ ءِ کننگ ءِ۔ او سندھ انا الس نا درد ءِ پہہ مریک۔ اوپارے کہ سندھ اٹی 14 سال آ داڑیل کوزہ گیر ءُ۔ اسہ ٹبر اس لٹنگ ءِ، خولم تے ہلک کونیرہ، پیشن نا ادارہ غاتیان ملوک آ امداد ءِ ہم دافک کونیرہ، الس داسہ اوفتیان حساب خواہک۔
