سکھر۔ 16 اپریل (اے پی پی) وزیراعظم عمران خان نا ساڑی گری ٹی بنجائی وزیر اسد عمر سکھر اٹی سندھ انا 14 ضلع غاتے کن 446 ارب روپئی نا میگا شونداری ڈٹ آتا پڑو ءِ کرینے و پارینے کہ وزیراعظم عمران خان مچ آ پاکستان نا ہمولیڈر ءِ ہرا ہر غریب شاری نا زند ءِ گچین کننگ خواہک، سندھ انا شونداری کن ہموکاریم کننگ ءِ ہرا بنجا نا زمواری جوڑ مفک، سندھ اٹی ہمو شون مریک ہرا سندھ انا مخلوق کن اسہ تغ اس جوڑ ئس۔ سکھر اٹی دود آن تران کرسا بنجائی وزیر اسد عمر پارے کہ وزیراعظم عمران خان سندھ انا ہرا 14 ضلع غاتے میگا ڈٹ آتے ٹی اوار کرینے اوفتے ٹی بدین، حیدر آباد، لاڑکانہ، ٹنڈوالہیار، دودو، جیکب آباد،میر پور خاص، ٹنڈومحمد خان، گھوٹکی، خیرپور،م نوشہروفیروز، سانگھڑ، شکارپور و سکھر اوار ءُ۔ میگا شونداری ڈٹ 306کلومیٹر سکھر۔حیدرآباد موٹروے نا اوار ءِ۔ دا ڈٹ اکن مراد سعید جندی وڑاٹ بھلو کوشست کرینے۔ بروک آ ہفتہ دا ڈٹ انا سی ڈی ڈبلیو پی آن منظوری ءِ ہلنگک۔ سندھ اٹی روہڑی و حیدر آباد تون اوار کیہی ریلوائی اسٹیشن تے اپ گریڈ کننگک۔ نجی زرکاری بریک و مسافر آتے آسراتی ملک، توانائی نا ڈٹ آتا پڑو ءِ کرسا اوپارے کہ سندھ اٹی لوڈشیڈنگ اتون مون تروئی تمک انتئے کہ داڑے ٹاسفارم آتا کمتی ءِ۔ دا ڈٹ انا ردات پوسکن ٹاسفارم تننگک۔ دا ڈٹ آن بجلی دُزی و نسخان آتے ٹی کمتی بریک، لوڈشیڈنگ اٹی ہم کمتی بریک، 30 ہزار سالانہ پوسکن ءُ کنکشن تننگک و بروک آ مسہ سال اٹی 26 ارب اسکان کٹیا تیٹی ودکی مریک۔ 1490کلامیٹر انفراسٹرکچر نا بحالی مریک ہراڑآن گیس انا بے سلنگ آن سپلائی ممکن مریک۔ میگا ڈٹ آتے ٹی 160 خلق آتے گیس انا فراوانی ہم اوار ءِ ہراڑآن 5074اُرافائدہ ہرفرہ۔ سندھ پاکستان نا غٹ آن زیات گیس ودی کروک آ صوبہ ءِ، ولے بدبختی اٹ سندھ انا کیہی خلق گیس انا آسراتی آن محروم ءُ، ہراضلع غان گیس پیش تمک اونا 5 کلومیٹر اسکان ہر خلق ءِ گیس انا فراوانی ءِ پک کننگک۔ سندھ اٹی پوسکن آ گاج ڈیم اناڈٹ اسہ متکن ءُ ڈٹ اسے ہرانا تفنگ کن سندھ حکومت تینا بشخ ءِ شاغنگ آن انکار کرے۔ وزیراعظم پارے کہ دا ڈٹ ءِ نن تینٹ پورو کینہ۔ ہراڑآن 28800ایکڑ رقبہ سیراب مریک۔ گھوٹکی ضلع کن نکاسی آب انا ڈٹ ہم اوار ءِ۔ دا ضلع نا دہائی تیا متکن ویل ایسر مریک۔، ماحولیات نظام نا گچینی کن ڈٹ اوار ءِ ہراڑآن اِرالکھ ایکڑ نا بحالی و ہزار آ مخلوق ءِ روزگار نا وارخواہی دوبریک۔
