ورنا آناں کاروبار ءِ واستہ سُت ءَ ابید وام دیگ بیت، سندھ حکومت نوکیں شہر جوڑ کنگ ءِ منصوبگ ءِ این او سی کینسل کنگ ءِ فیصلہ ءِ سر ءَ چار ءُ بچار بکنت، مزن وزیر عمران خان
سکھر۔16اپریل (اے پی پی): مزن وزیر عمران خان ءَ گوشت کہ سندھ ءِ توکی دمگ ءِ الس آنی واستہ سرجمیں تیاری ءِ گوما یک ٹوھیں پیکج ءِ زوران ءَ اتکگ آں، سندھ ءِ توکی نندوکیں مردم دیمروئی ءَ چہ پشت کپتگ انت۔ گچین کاری ءَ پنجاپ ءَ یک ٹوھیں مافیا ءِ گوما مقابلہ بوتگ ھمے واستہ سندھ ءِ توکی دمگ آنی سر ءَ گیش دلگوش کنگ نہ بوتگ، ورنا آناں بے سُت ءَ وام دیاں تانکہ آ وتی پاد آنی سر ءَ بہ اوشت انت، سکھر حیدر آبادموٹروے ، نوکیں گج ڈیم ءِ جوڑیشت ءَ چہ دمگ ءَ را باز سیت رس ایت، احساس ایمرجنسی کیش پروگرام ءِ کار رپک ءَ را گیش ودینان ءَ یک کروڑ 20 لکھ ھاندان ءَ تاں براں۔ سندھ حکومت کراچی ءِ نزیک ءَ نوکیں شہر ءِ جوڑ کنگ ءِ منصوبگ ءِ این او سی کینسل کنگ ءِ پیسلہ ءِ سر ءَ چار ءُ بچار بکنت، اے منصوبگ ءَ چہ سندھ ءَ را سیت رسیت، پشت کپتگیں دمگ ءُ جھلی تبک ءِ مردم آناں چست کنگ ءُ دیمروئی دیگ ءِ کوشست ءَ کنگ ءَ آں۔ سندھ ء، الس آنی جاور آناں مٹ کنگ ءِ واستہ سرجمیں کوشست ءَ کناں۔ اے ھیالانی درشانی آئی ءَ آدینگ ءِ روچ ءَ ادا سندھ ءِ 14 ضلع آنی واستہ 446 ارب کلدار ءِ میگا دیمروئی منصوبگ آنی چیردستیءَ کامیات ورنا پروگرام ءِ مراگش ءَ گشتانک دیگ ءَ ات۔ اے موہ ءِ سر ءَ گورنر سندھ عمران اسماعیل، بنجاھی وزیر اسد عمر، ڈاکٹر فہمیدہ مرزا، شاہ محمود قریشی، سید علی حیدر زیدی، محمد میاں سومرو، ھاسیں کمکار ڈاکٹر ثانیہ نشتر ءُ عثمان ڈار ھم ساڑی ات۔
