اسلام آباد۔ 16 اپریل (اے پی پی) گورنر سندھ عمران اسماعیل پارینے کہ الس ءِ رکھ و پرامن چاگڑد نا فراوانی صوبائی حکومت نا زمواری ءِ، بنجائی حکومت نا پیدوار موقف ءِ کہ کانود نا بالادستی ءِ ہرحال اٹ برقرار تخنگے و شرپسند آتا برخلاف کانودی کارروائی ءِ پک کننگے۔ داخیال آتا درشانی ءِ او وزیراعلیٰ سندھ سید مراد علی شاہ نا پن نوشتہ کروک آ چھٹی ٹی کرے۔ گورنر سندھ عمران اسماعیل تینا چھٹی ٹی پارینے کہ تدوک آ منہ دے آن کراچی تون اوار ملک انا غٹ بھلا شار تیٹی منہ شرپسند ناروا برانز و دھرنا کننگ ءُ۔ اوپارے کہ ای سرپند مریوہ کہ داحالیت آتا سوب آن کانود نافذ کروک آ ادارہ غاتے امن اٹ چیلنج آتا مون تروک ءِ۔ دابابت بنجائی حکومت نا بھاز پیدوار موقف ءِ کہ کانود نا بالادستی ءِ ہرحال اٹ برقرار تخنگے و داوڑنا زموار آتا برخلاف کانودی کارروائی ءِ پک کننگے۔ گورنر سندھ پارے کہ صوبائی حکومت نا اولی زمواری ءِ کہ او الس ءِ رکھ و پرامن چاگڑد اس فراوان کے ودا شرپسند زموار آتا سوب آن ودی مروک آ ٹریفک نا سلنگ ءِ چٹفنگ کن غٹ ممکنہ گام گیج آتے پک کننگے۔ اوپارے کہ بنجائی حکومت داوڑنا غٹ و ایلو چیلنج آتا مقابلہ ءِ کننگ کن سنبرینگوک ءِ و دارداٹ ہروڑنا کوشست آتے پک کننگ ءِ۔ گورنر سندھ تینا چھٹی ٹی کورونا دین انا ہم ذکر ءِ کرے۔ اوپارے کہ کورونا دین انا مسٹ میکو ریسہ پاکستانی الس ءِ بھاز بے وڑ زہمی کرینے ولے الحمداللہ بنجائی و صوبائی حکومت آک دا دین ءِ کچ اٹ کننگ کن غٹ دوئی وسیلہ غاتون پورو وڑاٹ پرعزم و پبی وڑاٹ کاریم کننگ ءُ۔ اوپارے کہ دُن تو ملک انا ایلو بشخ آتا مقابلہ ٹی صوبہ سندھ اٹی مثبت کیس آتا تناسب بھاز کم ءِ ولے ننے داخہ در سوگو حالیت آتے برقرار تخنگ و گچین کننگ کن پین متحرک و محتاط مننگ نا گرج ءِ۔ این سی او سی دا رداٹ غٹ صوبہ غاتون اسہ جامع و امنائی حکمت عملی اس مرتب کننگ ءِ۔ گورنر سندھ باوری کرفے کہ بنجائی حکومت الس نا راجی آسراتی خاص وڑاٹ متذکرہ پیچیدہ باندات ءِ ایسر کننگ اٹ حکومت سندھ انا کمکار و مدتگار مریک۔
