اسلام آباد۔ 15اپریل (اے پی پی) وزیراعظم عمران خان پارینے کہ نن پاکستان اٹی کانود نا بالادستی نا مشکل جہد کننگ اُن ہراٹی انشاء اللہ سرسہب مرینہ، طاقت ور مخلوق ءِ کانود نا ماتحت کننگ اسکان ملک شون ہلنگ کپک، غریب بندغ اخس کہ دُزی کے لندن اٹ جائیداد ہلنگ کپک، کرپٹ مخلوق ملک انا پیسہ غاتے پلسا پیشن دریر، ریاست مدینہ نا اصول آتے تینا کرسا پاکستانی قوم عظیم ءُ قوم اس جوڑ مریک، اسہ قوم اس ہم تعلیم آن بیدس شون ہلنگ کپک، حقدار و نیزگار طالب علم آتا سپورٹ کن بنجائی حکومت ہرسال پنچ ءُ نیم ارب روپئی نا 70ہزار وظیفہ ایتک، پنجاب و خیبرپختونخوانا حکومت آک ہم ہرسال 15،15ہزار اسکالر شپ ایترہ۔ داخیال آتا درشانی ءِ او پنچ شنبے نادے آ رحمت العالمین اسکالر شپ پروگرام نا دود آن تران کرسا کرے۔ وزیراعظم پارے کہ پنجاب حکومت ءِ خراج تحسین پیش کیوہ ہرا دا اسکالر شپ پروگرام ءِ درستی راستی کرفے۔ وزیراعلیٰ پنجاب داٹی ذاتی است خواہی ہلک، داسہ خیبرپختونخواہ و بنجائی حکومت ہم داپروگرام آ عمل کننگ ءُ۔ وزیراعظم دا است خواہی نا درشانی ءِ کرے کہ غٹ صوبہ غاک دا پروگرام ءِ چلیفر۔ اوپارے کہ خواجہ کریم ﷺ دنیا نا تاریخ نا عظیم انگا انسان ءِ۔ خواجہ ﷺ آنبار ءُ نئے کس اس ئس و نئے مریک۔ ہراعظیم سرسہبی تے خواجہ ﷺ دوئی کرے او اسہ پیغمبر اسے ہم دوئی متوس۔ نن خواجہ ﷺ نا تعلیمات آتے تینا زند انا چندی بشخ آتے ٹی نافذ کتنون۔ ریاست مدینہ نا اصول ننکن گچین ءُ راہشونی اس فراوان کیک۔ نناحکومت خواہک کہ خواجہ کریم ﷺ نا تعلیمات و اسوہ ءِ زند اٹی اوار کے۔ خواجہ کریم ﷺ مدینہ نا اسلامی ریاست اٹ کانودنا بالادستی و فلاحی ریاست اس جوڑ کرے و تعلیمی ایمرجنسی نافذ کرے۔خواجہ کریم ﷺ ہراتم کفار نا بندی تے ہلک تو اوفتا اسہ بندی نا پدی تننگ نا بدلہ 10مسلمان تے خوانفنگ نا شڑت ءِ تخا و علمءِ اولیت تس۔ اسلام علم انا دوئی کننگ ءِ عبادت نا درجہ تس و ہنداخاطرآن صدی تسکان دنیا نا چندی پنی آ سائنسدانک مسلمان ئسر و ہر بشخ اٹی مسلمانک سرکڑدہ ئی کریر۔ وزیراعظم پارے کہ خواجہ کریم ﷺ رحمت اللعالمین مرسا گدریفنگانے ہنداخاطرآن خواجہ ﷺ نا پن آ بناکروک آ دا وظیفہ بیرہ مسلمان تیکن آخا بلکن ملک اٹی ہرمذہب نا طالب علم آک فائدہ ہرفنگ کیرہ۔ دااسکالرشپ میرٹ آ تننگک و آن لائن درخواست آتے وصول کننگک۔ پاکستان اٹی اسہ حکومت اس ہم داوڑنا وظیفہ تتنے۔ بنجائی حکومت ہرسال پنچ ءُ نیم ارب روپئی نا 70 ہزار وظیفہ ایتک۔ 5 سال اسکان دا وظیفہ ءِ تننگک و ہنداوڑ دا پروگرام نا رداٹ 28 ارب روپئی نا مسہ نیم لکھ اسکالر شپ تننگک۔ پنجاب و خیبرپختونخوانا حکومت ہم اسہ اسہ ارب روپئی آن 15,15ہزار اسکالر شپ ایتک۔ ہنداوڑ ہرپنچ آ سال اٹی ہڑتوم آ صوبہ غاتے ٹی 75,75ہزار وظیفہ تننگک۔ وزیراعظم پارے کہ تعلیم اٹ قومک مون آ بریرہ و ہراراج اٹ ہراتم اسکان کانود نا حکمرانی مف تو ہمو راج شون ہلنگ کپک۔ خواجہ کریم ﷺ پاریسس کہ نمے آن مست انا قومک ہنداخاطرآن بھس مسر کہ او طاقت ور ءِ کانود نا وڑاٹ سزاتتورہ و کانود بیرہ غریب کن ئس۔ وزیراعظم پارے کہ غریب بندغ اخس کہ دُزی کے او لندن اٹ جائیداد ہلنگ کپک وخت اس کہ ہزگار و وڈی خور مخلوق نئے بیرہ ملکی دولت ءِ پُلرہ بلکن اوفتے پیشن نا ملک آ گدریفسا دوہرانسخان کیرہ۔ اقوام متحدہ نا ادارہ نا رپورٹ نا رداٹ اسہ ہزار ارب روپئی ہرسال نیزگار ملک آتیان پلسا خراج دُز آتا جنت اٹی دننگک۔ وزیراعظم دا عزم انا درشانی ءِ کرے کہ طاقت ور مخلوق ءِ کانود نا تابع کننگک انتئے کہ داڑآن بیدس ملک شون ہلنگ کپک۔ وزیراعظم پارے کہ ہراتم اسکان فلاحی ریاست تینا زمورای تے پورو کپک لس بندغ دا ریاست ءِ تینا ریاست تکپک۔ علم آن بیدس اسہ قوم اس ہم شون ہلنگ کپک۔ دنیا ٹی یہودیک چنکو کچ اسے ٹی ءُ ولے ہر بشخ اٹی مون آٹو۔ دانا سوب علم انا پڑاٹ اوفتا شونداری ءِ۔ وزیراعظم پارے کہ نن کانود نا بالادستی نا مشکل جہد کننگ اُن و نن دا جہد اٹ سرسہب مرینہ۔ وزیراعظم پارے کہ پنجاب و خیبرپختونخوا ٹی ہر شاری ءِ ہیلتھ انشورنس فراوان کننگک۔ احساس پروگرام نا رداٹ ہنکین تا کمک اٹ حقدار مخلوق ءِ کن وخور و رہنکین فراوان کننگ انگ ءِ و حکومت ”میلز آن ویلز“ پروگرام نا بناءِ کرینے تانکہ کس اس لنگڑ خاچپ۔ نن راج اٹی علم انا جستجو ودی کننگ و پاکستانی قوم ریاست مدینہ نا اصول آتیا چلینگسا اسہ عظیم ءُ قوم اس جوڑ مریک۔ داکان مست بنجائی وزیر تعلیم و کسبی تربیت شفقت محمود پارے کہ انسانیت نا پن اولیکو کلہو تعلیم نا ءِ، اسلام تعلیم نا مون آ دننگ آ زور شاغک۔ تعلیم ہر راج انا شونداری کن بنداوی سوب ءِ۔ تعلیم آن بیدس اسہ راج اس ہم شون ہلنگ کپک۔ فلاحی ریاست اٹ تعلیم ءِ بنداوی حیثیت دوئی ءِ۔ اسلام تعلیم نا مون آ دننگ آ زو ر شاغک۔ اوپارے کہ اسلامی راج اٹ تعلیم ہر نرینہ و نیاڑی آ فرض ءِ۔ اوپارے کہ پی ٹی آئی نا حکومت تعلیم ءِ ہر شاری اسکان سرکننگ کن اولیتی بنداو تیا گام گیج کرینے۔ اورحمت اللعالمین اسکالر شپ 50 درسد اسکالر شپ طالبات آتے کن ءِ۔ رحمت اللعالمین اسکالر شپ پروگرام مچ آ ملک انا ورناتیکن ءِ۔ اسکالر شپ اکن 5 سال آتیکن 27 ار ب روپئی جتا کننگانے۔ اوپارے کہ دا اسکالر شپ پروگرام پاکستان نا 129پبلک سیکٹر یونیورسٹی تیٹی تننگک۔ فلاحی ریاست اٹ تعلیم ءِ بنداوی حیثیت اس دوئی ءِ۔ اسکالر شپ کم کٹیا کروک اُراوالا تے تننگک۔ وزیراعلیٰ پنجاب سردار عثمان بزدار پارے کہ وظیفہ غاتا کمک اٹ محروم طالب علم آتے زرگزرانی سپورٹ فراوان کننگ ءِ۔ وظیفہ غاتا ساف و شفاف بشخنگ کن ویب پورٹل اس لانچ کننگانے۔ اوپارے کہ طالب علم آک اسکالر شپ اکن اُراٹی تولوک آن لائن اپلائی کننگ کیرہ۔ وزیراعظم نا اسکالرشپ پروگرام آن نیزگار و نیامی تپہ ءِ تعلیم نا آسراتی دُوبریک۔ اوپارے کہ رحمت اللعالمین اسکالر شپ پروگرام اٹ طالب علم آک اُراٹی تولوک ویب پورٹل آ اپلائی کننگ کیرہ۔ اوپارے کہ صوبائی حکومت تعلیمی ادارہ غاتے ٹی چندی وڑنا اسکالر شپ آتا بناءِ کرینے۔ وزیراعلیٰ خیبرپختونخوا محمود خان پارے کہ صوبہ ٹی ہائرایجوکیشن کمیشن نا رداٹ 34 کروڑ روپئی نا اسکالر شپ پروگرام نا بناءِ کننگانے۔ وزیراعظم نا ویژن ن ارداٹ لس و نیزگار بندغ ءِ تعلیم میسر مریک۔ اوپارے کہ خیبرپختونخوا ٹی چندی کہول آ صوبائی حکومت تعلیمی وظیفہ تننگ ءِ۔ رحمت اللعالمین اسکالر شپ پروگرام اٹ صوبائی حکومت ہم بشخ شاغک۔
