راولپنڈی۔ 15اپریل (اے پی پی) پاک فوج انا سروک جنرل قمرجاوید باجوہ فوجی فاؤنڈیشن ہیڈکوارٹر نا دورہ ءِ کرے۔ او100کٹ ہسپتال و فاؤنڈیشن نرسنگ اسکول نا بناءِ کرے، آرمی چیف ءِ برجا و آخبت نا ڈٹ و چندی باندات آتا بارواٹ حوال ہم تننگا۔ پاک فوج انا شعبہ تعلقات عامہ (آئی ایس پی آر) نا رداٹ فوجی فاؤنڈیشن ہیڈکوارٹر آ سرمننگ آ ایم ڈی و سی ایس او فوجی فاؤنڈیشن وقار احمد ملک پاک فوج انا سروک جنرل قمر جاوید باجوہ ءِ بخیر کریر۔ داوخت آ پاک فوج انا سروک جنرل قمر جاوید باجوہ فوجی فاؤنڈیشن نا کنڈآن آب اٹ خذمت آتیکن کارکڑد و عزم انا ستاءِ کرے۔ دورہ ٹی جنرل باجوہ 100 کٹ ہسپتال و فاؤنڈیشن یونیورسٹی انسٹیٹیوٹ اسکول آف نرسنگ نا بناءِ ہم کرے۔ یات سلے کہ فوجی فاؤنڈیشن خواری و خذمت نا بڑزکو درور ءِ، فوجی فاؤنڈیشن 1954 آن پدریسہ قومی خذمت اٹ لگوک ءِ۔ فوجی فاؤنڈیشن ملک انا شونداری و شونہالی و زرگزرانی شونہالی ٹی پدریسہ اہم کڑد ادا کننگ ءِ۔ تدوک آ سال فوجی فاؤنڈیشن بنجائی و صوبائی حکومت آتے خراج، ڈیوٹی و لیویز نا مد اٹ کم و ود 175 بلین روپئی ادا کرے ہرا پاکستان نا بنجائی بجٹ نا کم و ود 2.45درسد ءُ۔ تدوک آ دہ سال اٹی فوجی فاؤنڈیشن خراج و ڈیوٹی نا مد اٹ سینزدہ ءُ نیم سد ارب روپئی آن زیات زر قومی خزانہ ٹی جمع کرفے۔ ریٹائرڈ فوجی تا راجی آسراتی کن جوڑ مروک آ ادارہ غان اینو لکھ آ سویلین بندغ آک ہم فائدہ ہرفنگ ءُ۔ فوجی فاؤنڈیشن نا 71 درسد ملازم سویلین وخت اس کہ بیرہ 29 درسد ریٹائرڈ فوجی ءُ۔ فوجی فاؤنڈیشن نا ساڑی آ مینجنگ ڈائریکٹر وقار احمد ملک تینٹ اسہ سویلین اسے۔ ریٹائرڈ فوجی ملازم آتے ٹی اکثریت 40آن 45سال انا وئی ٹی ریٹائرڈ مروک آ جونیئررینکس آتا ءِ۔ فوجی فاؤنڈیشن دا ملازم آتے اسہ فعال و کاریمی افرادی قوت اس جوڑ کیک تانکہ او ملکی زرگزران آ بھاریم مفس۔ داوخت آ فوجی فاؤنڈیشن نا چندی ڈٹ و دفاعی کاریم تیان 9 ملین بندغ فائد ہ ہرفنگ ءُ ہراکہ ملکی آبادی نا 4.5درسد ءُ۔ تعلیم و جان جوڑی نا بشخ آتے ٹی خاص وڑاٹ فوجی فاؤنڈیشن نا خذمت بے مٹ ءِ۔ تدوک آ 10سال اٹی فوجی فاؤنڈیشن جان جوڑی و تعلیم نا بشخ آتیا 79بلین روپئی خڑچ کرے۔ دافتے ٹی 45 بلین روپئی جان جوڑی وخت اس کہ 34بلین روپئی تعلیمی ڈٹ آتیا خڑچ مس۔ داوخت اٹی 22ملین جان جوڑی،م وخت اس کہ 0.45ملین طالب علم تعلیم نا آسراتی آں براہ راست فائدہ ہرفیر۔ دا وخت آ مچ آ ملک اٹی فوجی فاؤنڈیشن نا 133 تعلیمی ادارہ قائم ءُ ہرافتے ٹی کالج، اسکول، ووکیشنل و ٹیکنیکل ٹریننگ سینٹر ز اوار ءُ۔ فوجی فاؤنڈیشن، جان جوڑی نا 74ہند ہم چلیفنگ ءِ ہرافتے ٹی چندی بھلو ہسپتال، کلینکس و میڈیکل سینٹرز اوار ءُ۔ فوجی فاؤنڈیشن ہیلتھ کیئر سسٹم آن فائدہ ہرفوک آ 80 دروسد ناجوڑ غازی و شہید آتا خاہوت آک ءُ۔ فوجی فاؤنڈیشن ہسپتال راولپنڈی ٹی جوڑ مصنوعی عزوہ غاتا مرکز دہشت گردی نا برخلاف جنگ آن زہمی بندغ آتا بحالی ٹی اہم ءُ کڑد اس ادا کرینے۔ داکان بیدس شہید آتا خاہوت آتا راجی آسراتی ٹی ہم فوجی فاؤنڈیشن و داوڑکون آ ایلو عسکری رفاعی ادارہ غاتا خذمت آک بھاز بھلن ءُ۔
