اسلام آباد۔ 15اپریل (اے پی پی) بنجائی وزیر اقتصادی امور مخدوم خسرو بختیار کراچی ٹرانسپورٹ پروجیکٹ اٹ سست روی آ ناراضگی نا درشانی ءِ کرسا پارینے کہ سندھ انا حکومت ءِ جہانی مالیاتی ادارہ غاتا کمک ات برجاتاخیر نا گواچی ڈٹ آتے زوت ایسر اسکان سرکننگ کن گام گیج کے۔ اوداہیت ءِ پنچ شنبے نادے آ داڑے درملکی کمکاری اٹ برجا ڈٹ آتا چاروکی کن جوڑ قومی رابطہ کمیٹی نا دیوان نا کماشی ءِ کرساپارے۔ دیوان اٹی سندھ اٹی جہانی بینک و ایلو جہانی مالیاتی ادارہ غاتا کمک اٹ برجا ڈٹ آتا سرجمی اٹ جاچ ءِ ہلنگا۔ دیوان اٹی کراچی ٹرانسپورٹ پروجیکٹ تون اوار مواصلات، تعلیم و آبی وسیلہ غاتون اوار چندی بشخ آتے ٹی پیشن نا کمک اٹ چلینگوک آ 27 ڈٹ آتیا پیش رفت نا جاچ ءِ ہلنگا۔ بنجائی وزیر جہانی بینک انا کمک اٹ کراچی ٹرانسپورٹ پروجیکٹ اٹ سست روی آ ناراضگی نا درشانی ءِ کرے و پارے کہ سندھ حکومت جہانی بینک و ایلو مالیاتی ادارہ غاتا کمک اٹ چلینگوک آ ڈٹ آتے زوت و تخوک مد اٹ پورو کننگ کن گام گیج کے۔ اوپارے کہ کراچی ٹرانسپورٹ پروجیکٹ، کشت وکشار و آبپاشی کون آ السی فائدہ غاتا ڈٹ آتے زوت آن زوت و اولیتی بنداو تیا پورو کے۔ اوپارے کہ سٹنٹڈ گروتھ ڈٹ بھاز اہمیت نا حامل ڈٹ اسے و داڈٹ ءِ دمدستی وڑاٹ پورو کننگ اٹ تاخیر و لاپرواہی ءِ سگنگ پننگک۔ بنجائی وزیر پارے کہ سندھ اٹی تعلیم، جان جوڑی و کشت وکشار نا بشخ آتے ٹی برجا ڈٹ آتا پوروی آن شاری تے آسراتی فراوان کننگ اٹ آسانی مریک۔
