اسلام آباد۔ 15اپریل (اے پی پی) بنجائی وزیر خزانہ، محصولات و صنعت و پیدوار محمد حماد اظہر پارینے کہ پاکستان و جاپان نا نیام اٹ سال آتیان دوستانہ و خوشگوارتعلقداری ءِ و ہڑتوم آ ملک آتا نیام اٹ تعلقداری آخبت اٹ پین زیات مریک۔ پاکستان اٹی اختراعی واپاری مصنوعات و خذمت آتا فراوانی ٹی جاپانی زرکار و پوریاگر آتے ممکنہ آسراتی فراوان کننگ اٹ سنبرینگوک اُن۔ اوداہیت ءِ پنچ شنبے نادے آ داڑے پاکستان اٹی جاپان نا سفیر کونی نورامتسوداتون اوڑدہی ٹی گپ و تران کرسا پارے۔ جاپان نا کمرشل قونصل اشی کین سوکی و سیکنڈ سیکرٹری مس سومامایو کو ہم اوڑتون اوار ئسر۔ وزیر خزانہ جاپان نا سفیر و اوڑتون اوار ڈل ءِ جم وجو ش اٹ بخیر کرسا پارے کہ پاکستان و جاپان نا نیام اٹ سال آتیان دوستانہ وخوشگوار تعلقداری ءِ و ہڑتوم آ ملک آتا نیام اٹ تعلقداری آخبت اٹ پین زیات مریک، اوبنداوی پنجر و ادارہ غاتا شونداری ٹی پاکستان ءِ کمک نا فراوانی آ جاپان نا منت واری ءِ ہرفے و پارے کہ جاپان پاکستان نا بھلاشونداری شریدار ءِ۔ اوڑدہی ٹی ہڑتوم آ کنڈآتا است خواہی نا باندات آتیا گپ وتران مس، بنجائی وزیر جاپان نا سفیر ءِ ہمو گام گیج آتیان معلومدار کرے ہرانا سوب آن اقتصادی سرجزااتے ٹی ودکی مس۔ اوپارے کہ سخت مالیاتی نظم و ضبط انا سوب آن ملک انا پرائمری بیلنس ودسا ہنانے۔ اوپارے کہ کوویڈ۔ 19نا دین انا کاروبار و انسانی جان جوڑی آ اثرآتے کم کننگ کن حکومت پامدار و ہدف آ مبنی پالیسی درستی راستی کرفے، حکومت احساس پروگرام ن ارداٹ مصارف نا رخ راج اناغٹ آن نیزگار و نزور تپہ غاتا کنڈآ کرے۔ جاپان نا سفیر داوخت آ پارے کہ جاپان پاکستان تون تینا ہڑتوم آ کنڈآتا تعلقداری ءِ قدر انا نظر اٹ ہرک، اوبنجائی وزیر ءِ جاپانی ادارہ غاتا پاکستان اٹ گام گیج آتیان معلومدار کرے و پارے کہ بروک آ دے تیٹی ملک آتا نیام اٹ واپاری و اقتصادی رابطہ ءِ پین مون آ دننگ دوئی مریک۔ اوڑدہی ٹی پاکستان وجاپان نا نیام اٹ واپارو زرکاری نا گمان و ہڑتوم آ ملک آتا نیام اٹ چندی بشخ خاص وڑاٹ آٹو موبائل نا بشخ اٹی جاپانی زرکاری نا ستاءِ کرے۔
