پاکستان نا تاریخ اٹی اولیکو وار ہاؤسنگ نا بشخ اٹی سرکاری کہول آ داخہ بھلاڈٹ آتا بناءِ کننگانے،وزیراعظم عمران خان

سرگودھا۔ 14اپریل (اے پی پی) وزیراعظم عمران خان پارینے کہ پاکستان نا تاریخ اٹی اولیکو وار ہاؤسنگ نا بشخ اٹی سرکاری کہول آ داخہ بھلاڈٹ آتا بناءِ کننگانے، تعمیرات نا بشخ اتون 30صنعت وابستہ ءُ، داڈٹ آتیان ورناتے روزگا رنا وارخواہی دُوبریک، صنعت ءِ مون آ دننگک، ملکی دولت اٹی ودکی مریک۔ اُراتا دوئی کننگ کن مخلوق مہالو آں رجسٹریشن کرفنگ نا بناءِ کرینے۔ داخیال آتا درشانی ءِ او چارشنبے نادے آ سرگودھا ٹی پوسکن آ پاکستان ہاؤسنگ پروگرام نا رداٹ 1ہزار 175اُراتا تفنگ نا ڈٹ انا بنداوءِ تخسا کرے۔ سرگودھا ٹی 6 ہند آتیا مسہ مرلہ والا کم خڑچ آن اُراتفنگک۔ حکومت پنجاب دا ڈٹ اکن ڈغار و ایلو آسراتی تے ایتک۔ داڈٹ آ کاریم فرنٹیر ورکس آرگنائزیشن (ایف ڈبلیو او) و نیشنل لاجسٹک سیل اسیجائی وڑاٹ کیرہ۔ پنجاب بینک داڈٹ آتے کن حقدار بندغ آتے مورگیج نا آسراتی ایتک ہراداناقسط ءِ تننگ کیرہ۔ پوسکن آ پاکستان ہاؤسنگ اتھارٹی دا ڈٹ انا رداٹ جوڑ مروک آ اُرا قرعہ اندازی ناکمک اٹ حقدار بندغ آتے ٹی بشخک۔ دا ڈٹ اکن حکومت ءِ 33ہزار 528درخواست دوئی مسنے۔ سرگودھاٹی ختی نا نقاب کشائی نا وخت آ وزیراعلیٰ پنجاب عثمان بزدار ہم اوڑتون اوار ئس۔