اسلام آباد۔ 14اپریل (اے پی پی) وزیراعظم عمران خان پارینے کہ روچہ مبارک نا بابرکت انگا تُو اٹی ضرورت مند آتا خاص خیال ءِ تخنگ و ناروا منافع خوری و کوڑی کننگ اٹ اوار زموار آتا پیدواری و حوصلہ شکنی ءِ کننگ نا گرج ءِ، عالم انسانیت داوخت آ کورونا دین انا بھسکاری تا گواچی ءِ، ترابیح نا نماز و اعتکاف نا بابت ایس او پی تیا عملدرآمد کننگ ننا انفرادی و اجتماعی زمواری ءِ، ننے یکجا مرسا دانازرک حالیت آتا مقابلہ ءِ کروئی مریک۔داخیال آتا درشانی ءِ او سے شنبے آ روچہ مبارک نا بناء آ قوم انا پن کلہو اٹی کرے۔ وزیراعظم پارے کہ او روچہ مبارک نا بننگ آ مچ آ قوم و ملت اسلامیہ ءِ مبارکباد پیش کیک، اللہ تعالیٰ نا فضل و کرم ءِ کہ او ننے اسہ وار ولدا روچہ مبارک نا فیض و برکت آتیان فائدہ ہرفنگ نا موقع اس فراوان کرے۔ اوپارے کہ روچہ نا مسخت انسان اٹی پرہیزگاری و ایثار وہمدردی نا جوزہ ودی کننگ ءِ، روچہ نا حالیت اٹ بندغ اللہ تعالیٰ نا پرمان نا اطاعت ءِ کرسا ہرہموگڑاغان تینے تورک ہراایہن انگا دے تیٹی اوڑکن جائز مریک، ہنداوڑ بندغ اٹی پرہیزگاری و تقویٰ ودی مریک۔ نیز روچہ نا حالیت اٹ بین و ملاسی ءِ سگنگ آن ایلو فتا احساس و ہمددی نا جوزہ مون آ کاہک۔ اوپارے کہ داوخت آ عالم انسانیت کورونا نا بھسکاری تا گواچی ءُ، تدوک آ روچہ مبارک اٹی پاکستانی قوم ہراوڑ ایس او پی تیا عمل کرے و دا دین انا تالانی ءِ ہرممکن حداسکان توریر او ستاکڑزک، داسال آ ہم عالم دین و مشائخ آتا سلابت اٹ روچہ مبارک اٹی نماز ترابیخ و اعتکاف نا بابت ہراایس او پی تیا امنا کننگانے، روچہ مبارک اٹی دافتیا عملدرآمد ءِ پک کننگ ننا غٹ انا انفرادی و اجتماعی زمواری ءِ، ننے دا نازرک حالیت آتا مقابلہ ءِ اسٹ مرسا کروئی ءِ۔ وزیراعظم پارے کہ روچہ مبارک نا دابابرکت انگا تُو اٹی ایثار و ہمدردی نا درشانی ءِ کرسا ننے ضرورت مند آتا خاص خیال ءِ تخوئی ءِ و ناجائز منافع خوری و کوڑی کننگ اٹ اوار زموار آتا پیدواری و حوصلہ شکنی ءِ کروئی ءِ۔ اوپارے کہ دا مبارک ساہت آتے ٹی اللہ تعالیٰ ناحضور دعاکروئی ءِ کہ اللہ تعالیٰ تینا خاص فض وکرم کرسا مچ آ عالم ءِ دا آزمائش آن کشے، اللہ تعالیٰ پاکستانی قوم انا کمک ءِ کے و ننے آزمائش نا داساہت اٹ صبر و تحمل اٹ سرسہبی ایتے۔ آمین
