اسلام آباد۔ 14اپریل (اے پی پی) صدر مملکت ڈاکٹر عارف علوی روچہ مبارک نا بننگ آ مچ آ قوم و ملت اسلامیہ ءِ مبارکباد پیش کرسا پارینے کہ روچہ مبارک نا تُو محتاط وڑاٹ زند ءِ تیر کننگ نا تربیت نا موقع اس فراوان کیک، کورونا دین انا مسٹ میکو ریسہ غان مچ آ دنیا فریشان ءِ، عالم دین و مشائخ آتا سلابت اٹ طے کروک نماز ترابیح و اعتکاف نا بابت ایس او پی تیا عملدرآمد ءِ پک کننگ تون اوار اوار ویکسین خلفنگ نا ہم بست وبند ءِ کننگے، روچہ ٹی زکواۃ و فطرانہ زیات آن زیات ادا کبو و ضرورت مند آتا خاص خیال ءِ تخبو۔ روچہ مبارک ۲۴۴۱نا وخت آ قوم انا پن تینا کلہو اٹی صدر مملکت پارے کہ روچہ مبارک نا بننگ آ مچ آ قوم و ملت اسلامیہ ءِ مبارکبادی ایتیوہ۔ دا اللہ تعالیٰ نا خاص فضل و کرم ءِ کہ او ننے اسہ وار ولدا روچہ مبارک نا فیض و برکت آتیان فائدہ ہرفنگ نا موقع اس فراوان کرے۔ اوپارے کہ اللہ تعالیٰ ننے ٹی تقویٰ ودی کننگ کن روچہ نا روچہ غاتے فرض کرے۔ تقویٰ نا مطلب پرہیزگاری ءِ، ایلو لوز آتے ٹی محتاط وڑاٹ زند ءِ تیر کننگ تقویٰ ءِ و روچہ مبارک نا تُو محتاط وڑاٹ زند ءِ تیر کننگ نا تربیت نا موقع اس افراوان کیک۔ صدر عارف علوی پارے کہ داوخت آ کورونا دین انا مسٹ میکو ریسہ غان مچ آ دنیا فریشان ءِ و غٹ ملک آک ہلہلہ ئی بنداو تیا دا دین انا توننگ کن کوشست کننگ ءُّ، کورونا نا دا ریسہ مست آن زیات شدید و خطرناک ءِ۔ اللہ تعالیٰ ننے تینا جان تیا ظلم کننگ آن منع کیک، ننے تینا و تینا دوست آتا زند انا رکھ اکن پرہیزگاری نا صفت ءِ تینائی کروئی مریک۔ بے گرج وڑاٹ راجی ملنگ آن پرہیز کروئی مریک۔ طہارت و حفظان جان جوڑی نا اصول آتے تینا کروئی مریک۔ طبی چاہندار آتا پارت آتا رداٹ ماسک بیننگ و ویکسین خلفنگ نا بست وبند ہم المی ءِ۔ اوپارے کہ روچہ مبارک اٹی عالم دین و مشائخ آتا سلابت اٹ طے کروک نماز ترابیخ و اعتکاف نا بابت ایس او پی تیا پبی عمل کیر۔ عالم دین تا پارت نا رداٹ نماز اٹی 3فٹ انا فاصلہ تخر، وضو اُراٹی کیر وتین تون مثلہ اس اتیربریر۔بزرگ آک اُراٹی نماز خوانر۔ صدر مملکت پارے کہ عالم دین تا سلابت اٹ طے کروک دا رکھی گام گیج آتیا عمل ننا قومی و دینی زمواری ءِ۔
