اسلام آباد۔ 14اپریل (اے پی پی) بنجائی وزیر داخلہ شیخ رشید احمد نا کماشی ٹی امن و ایمنی نا حالیت آتیا دیوان اس اڈ ہلک ہراٹی بنجائی وزیر مذہبی امور نور الحق قادری بشخ ہلک۔ وزارت داخلہ غان جاری بیان نا رداٹ دیوان اٹی سیکرٹری داخلہ، آئی جی پنجاب، چیف کمشنر اسلام آباد، آئی جی اسلام آباد، رینجرز و ایلو کانود نافذ کروک آ ادارہ غاتا نمائندہ غاک بشخ ہلکر۔ دیوان اٹی آئی جی پنجاب انعام غنی و کمشنر راولپنڈی نا بذریعہ ویڈیو لنک بشخ ہلکر۔ دیوان اٹی مذہبی جماعت نا کنڈآن برانز نا حالیت آتا جاچ ءِ ہلنگا۔ وزیر داخلہ شیخ رشید احمد نا پولیس، رینجرز و ضلعی انتظامیہ ءِ علاقہ ءِ کلیئر کرفنگ آ مبارکبادی تس و دیوان اٹی شہید مروک آ پولیس نا ورناتے خراج عقیدت کریر۔ دیوان اٹی فیصلہ کننگانے کہ کانود ءِ دوٹی ہلوک آتون سختی اٹ مون تننگک۔ وزیر داخلہ دیوان اٹی بشخ ہلوک آتے پارت کرے کہ ریاست نا رٹ ءِ ہرحال اٹ پک کننگے۔ اوپارے کہ موٹرویز، جی ٹی روڈ و ایلو بھلا سڑک آتے ٹریفک کن کلیئر کرفنگانے۔ اسلام آباد راولپنڈی ٹی لیاقت باغ، ترنول، بارہ کہو، روات نا علاقہ غاتے ٹی ٹریفک کن ملفنگانے۔ شیخ رشید احمد پارے کہ رینجرز پولیس و انتظامیہ تون اواری اٹ بھاز زبردست ءُ کاریم اس کرینے۔
