اقوام متحدہ۔ 14اپریل (اے پی پی) پاکستان اقوام متحدہ امن مشن نا برخلاف مروک آ جلہو آتے ٹی ودکی آ گڑتی نا درشانی ءِ کرسا خواست کرینے کہ پوسکن آ خطرہ غاتے ٹی مچ آ دنیا ٹی حساس ہند آتیا خذمت سرتروک آ امن مشن نا کارندہ غاتا رکھ و سلامتی ءِ پک کننگ نا گرج ءِ۔ اقوام متحدہ ٹی پاکستان نانائب آخبتی مندوب عامر خان تدوک آ دے پیس کیپنگ آپریشن آ سلامتی کونسل نا ورکنگ پڑک ءِ پارے کہ تدوک آ 6 دہائی ٹی نن تینا 160امن فوجی کارندہ غاتے گوہان ہرافتیان 3تدوک آ سال زوال کریر۔ اوپارے کہ پاکستان اقوام متحدہ ٹی امن آپریشن تے ٹی مرکزی فوجی شریداری نا حیثیت اٹ امن کارندہ غاتا رکھ و سلامتی آ گپ وتران اٹی بھاز است خواہی تخک و دارداٹ پاکستان امن و ایمنی نا بنداوی اصول آتے برقرار تخنگ و اوفتیا عملدرآمد ءِ پک کننگ نا خواست کیک وخت اس کہ پاکستان نا امن فوجی کارندہ دیکی افریقی ملک سیرالیون، برونڈی، لائیبریا و تیمورلیستے آنبار اقوام متحدہ نا امن مشن تے ٹی بھاز سرسہبی دوئی کرینے۔ اوامن مشن نا کارندہ غاتا برخلاف جلہو و مرک آتے ٹی ودکی نا حوالہ ءِ ترسا اقوام متحدہ غا زور شاغا کہ اودے تینا امن کارندہ غاتا رکھ ءِ پک کننگ و اوفتیا مروک آ جلہو آتے توننگ نا گرج ءِ و داہیت ءِ پک کننگے کہ اوفتا برخلاف جلہو آتا ڈٹ بندی ٹی اوار بندغ آتے اوفتے اوفتا کروک نا سزا تننگے۔ اوامن کارندہ غاتا سخت رکھ و سلامتی کن منہ سلاہ و سوج پیش کرے ہرافتے ٹی خصوصی مہارت کون آ ہندی ساختہ بمب و بارودی سرنگ آتون مون تننگ اٹ تربیت تننگ، امن مشن نا شریدار آتا لائخی تیٹی ودکی کننگ و امن و ایمنی نا قیام اٹی سیاست نا کڑد بھاز المی ءِ۔ اوپارے کہ امن بیرہ کارندہ غاتا ہی کاریم اف بلکن سیاسی ایسری و ثالثی عمل ہم داڑکن بھاز المی ءِ۔ پاکستان نا نائب آخبتی نمائندہ پارے کہ داکان بیدس پاکستان جموں و کشمیر اٹی لائن آف کنٹرول نا چاروکی ءِ کروک آ اقوام متحدہ نا بھاز متکن امن مشنز یونائیڈ نیشنز ملٹری آبزرور گروپ ان انڈیا اینڈ پاکستان (یواین ایم او جی آئی پی) نا ہم میزبان ءِ۔
