برلن۔ 13اپریل (اے پی پی) وزیر خارجہ مخدوم شاہ محمود قریشی سے شنبے نادے آ برلن اٹی پاکستانی سفارت خانہ نا دورہ ءِ کرے۔ جرمنی ٹی پاکستانی سفیر ڈاکٹر محمد فیصل و سفارت خانہ نا عملہ وزیر خارجہ ءِ جم و جوش اٹ بخیر کریر۔ وزیر خارجہ قونصلر سیکشن تون اوار سفارت خانہ نا چندی سیکشن تا دورہ ءِ کرے و پاکستانی کمیونٹی ءِ تروک آ آسراتی تیا است جمی نا درشانی ءِ کرے۔ وزیرخارجہ پارے کہ پیشن نا ملک آتے ٹی رہینگوک پاکستانی تا راجی آسراتی و اوفتے مون تروک ویل آتا اولیتی بنداو تیا ایسری ننا حکومت نا اولیت آتا بشخ ءِ۔ شاہ محمود قریشی پارے کہ میونخ اٹی زوت پوسکن ءُ قونصل خانہ اس ملنگ والا اُن تانکہ جرمنی تون ہڑتوم آ کنڈآتا اقتصادی رابطہ غاتے پین ودفنگ مریک۔ جرمنی تون ہڑتوم آ کنڈآتا اقتصادی رابطہ غاتے ودفنگ نا بھلو وارخواہی اس ساڑی ءِ۔ وزیر خارجہ جرمن اٹی رہینگوک پاکستانی تا دیرینہ خواست آ سفارتخانہ ٹی ملوک آ دفتر”عرضی نویسی“ نا بناءِ کرے۔ وزیر خارجہ سفارت خانہ ٹی جوڑ کروک ”فٹ بال کارنر“ نا ہم بناءِ کرے۔ وزیر خارجہ پارے کہ داہیت خوشی نا ءِ کہ جرمنی ٹی ہرسال پنچ کروڑ فٹبال پاکستان آن درآمد کننگک۔ وزیر خارجہ پارے کہ زرگزرانی سفارت کاری نا گچینی نتیجہ دوئی مننگ ءِ۔ جرمنی تون زرگزرانی تعلقداری ٹی پوسکن آ بشخ انا ودکی، ننا زرگزرانی سفارتی مہم نا مثبت بھرم تا عملی شاہدی ءِ۔ وزیر خارجہ سفارت خانہ ٹی تخوک ”وزٹر بک“ اٹی تینا تاثرآتے نوشتہ کرے۔
