اسلام آباد۔ 13 اپریل (اے پی پی) وزیر خارجہ شاہ محمود قریشی پارینے کہ پیشن نا ملک آتے ٹی رہینگوک آ پاکستانی تے وونٹ انا حق ترفنگ کن سنجیدہ کوشست کننگ اُن۔ داہیت ءِ او سے شنبے نادے آ جرمنی ٹی رہینگوک آ پاکستانی کمیونٹی نا نمائندہ ڈل آتون اوڑدہی ٹی پارے۔ ڈل انا بشخ ہلوک آک وزیر خارجہ ءِ جرمنی آ بننگ آ بخیر اٹ پاریر و پھل پیش کریر۔ وزیر خارجہ جرمن اٹی رہینگوک آ پاکستانی کمیونٹی نا خذمت آتے امنا کرسا اوفتے پاکستان و جرمنی نا نیام اٹ ہڑتوم آ کنڈآتا تعلقداری تا سوگوی کن اہم ذریعہ گوندا۔ وزیر خارجہ پارے کہ نن پیشن نا ملک رہینگوک آ پاکستانی تے کانودی وعڑاٹ زرانا ترسیل اٹ آسانی فراوان کننگ کن ”ڈیجیٹل روشن پاکستان“ ڈٹ انا بناءِ کرینے۔ پیشن نا ملک آتے ٹی رہینگوک پاکستانی تے وونٹ انا حق ترفنگ کن سنجیدہ کوشست کننگ اُن۔ نن الیکٹرانک وونٹنگ نا آپشن آ ہم سجفنگ اُن تانکہ پیشن نا ملک رہینگوک آ پاکستانیک آسراتی اٹ وونٹ انا حق ءِ کاریم اٹ اتنگ کیر۔ وزیر خارجہ پارے کہ دورہ جرمنی ٹی کنا جرمن ہم منصب و ایلو سرکڑدہ غاتون بھاز جوان ءُ اوڑدہی مس۔ نن پاکستان و جرمنی نا نیام اٹ ہڑتوم آ کنڈآتا اقتصادی و زرگزرانی کمکاری ءِ اسہ پوسکن ءُ جہت اسے آ دننگ اُن۔ پاکستانی کمیونٹی نا ڈل پاکستان و جرمنی نا نیام اٹ ہڑتوم آ کنڈآتا تعلقداری تا مون آ دننگ و پاکستانی کمیونٹی نا راجی آسراتی کن وزیر خارجہ نا کوشست آتا ستاءِ کرے۔ کمیونٹی ڈل میونخ اٹی سفارت خانہ نا ملنگ نا پڑو آ وزیر خارجہ نا منت واری ءِ ہرفے۔
