اسلام آباد۔ 13اپریل (اے پی پی) بنجائی وزیر ڈٹ بندی، شونداری، اصلاحات و خصوصی گام گیج و نیشنل کمانڈ اینڈ آپریشن سینٹر نا سروک اسد عمر پارینے کہ کورونا دین انا مسٹ میکو ریسہ ٹی ترندی نا سوب الس نا کنڈآن ایس او پی تیا عمل کپننگ ءِ، ہڑدے 70ہزار ڈوز خلنگ انگ ءِ، ملک اٹی داتم اسکان سینزدہ لکھ مخلوق ءِ کورونا غان بچفنگ نا ویکسین ڈوز خلنگانے وخت اس کہ داسہ ہم ننتون نہہ لکھ ڈوز پین ارے، صدر مملکت و وزیراعظم تون اوار آئینی عہدہ غاتیا تولوک مخلوق ہم تینا باری نا انتظار ءِ کریر و ویکسین خلفیر، تعلیمی ادارہ غاتا بند مننگ و ملنگ نا فیصلہ ءِ بین الصوبائی وزارتی کمیٹی کیک این سی او سی اوفتے بیرہ خطرہ غاتیان معلومدار کیک، اسہ وار کورونا نا گواچی بندغ آتے ٹی دُوارہ دین مننگ پنچ سد آن اسہ بندغ اٹی چانس ارے، نیشنل پریس کلب نا پروگرام میٹ دی پریس اٹی تینا خیال آتا درشانی ءِ کرسا بنجائی وزیر ڈٹ بندی و سروک این سی او سی اسد عمر نا پاننگ ئس کہ ننے کم و ود اسہ تُو مست دا نظر بننگ بناکرے کہ کورونا دین انا تالانی ٹی ترندی بننگ ءِ ننے شک مس کہ دابرطانوی دین تو بتنے پٹ وپول آ معلوم مس کہ واقعی دا برطانوی دین ءِ انتئے کہ داکان بھلو کچ اسے ٹی مخلوق برطانیہ غا کاہک بریک اوکان پد نن کوشست کرین کہ انتظامیہ و میڈیا نا کمک اٹ الس اسکان کورونا غان بچفنگ و رکھی گام گیج آتا بابت تینا کلہو ءِ الس اسکان سرکننگے ولے شاید مخلوق نا است اٹ اونا خوف چٹاکہ انتئے کہ نئے الس داوڑوڈول اٹ ایس او پی تیا عمل کرے و نئے انتظامیہ مخلوق آن داڑآ عملدرآمد کرفنگ کرے ہرانا سوب آن داد ین مچ آ ملک اٹی بھاز ترندی اٹ تالان مس۔ پنجاب، اسلام آباد، کے پی آزاد کشمیر آن پد داسہ بلوچستان و سندھ اٹی ہم برطانوی دین انا تالانی ٹی ودکی مون آ بننگ ءِ اوکان پد نن تدوک آ ہشت دہ دے آن سختی کرینن ہرانا سوب آن داسہ دا دین اٹی کمتی تو متنے ولے داٹی زرس سلنگ نظر بننگ ء، داسہ دُن تو روچہ بنا کننگ ءِ ہرانا آخیریکو عشرہ ٹی مخلوق اعتکاف اٹ تولک، عبادت آتے ٹی اختہ مریک و بازار تیٹی شاپنگ کن پیش تمرہ ہراڑے رش مریک ہنداخاطرآن داڑے بھاز زیات خیال کننگ نا گرج ءِ انتئے کہ خدانخواستہ اگہ دا دین زیات تالان مس تو حکومت ءِ زیات سخت گام گیج کروئی تمک ودانا اثر مخلوق نا روزگار آ تمک و ولدا دااثر پیری کنسا حکومت آ بریک۔ اسد عمر مستی پارے کہ دنیا ٹی اخس ویکسین نا خواست ءِ ہموخس سپلائی اف۔ امریکہ ویکسین جوڑ کروک آ ملک آتے ٹی مونی ءِ ولے اونا تینا آبادی زیات مننگ نا سوب آن او ویکسین زیات کچ اٹ ایلو ملک آتیا گدریفنگ مفک اوکان پد چین، بھارت و روس غٹ آن بھلا ذریعہ ءُ ہرافتیان پاکستان تون اوار ہر ملک ویکسین ہلنگ نا خواہندار ءِ پاکستان اٹی ہڑدے ہفتاد ہزار ڈوز خلنگ انگ ءِ، ملک اٹی داسہ سینزدہ لکھ مخلوق ءِ کورونا غان بچفنگ نا ویکسین ڈوز خلنگانے وخت اس کہ داسہ ہم ننتون نہہ لکھ ڈوز آن زیات ارے، و ننا کوشست ءِ کہ عئید آن پد ہڑدے اِرالکھ آن زیات مخلوق ءِ ویکسین خلنگ مرے۔ صدر مملکت و وزیراعظم تون اوار آئینی عہدہ غاتیا تولوک مخلوق ہم تینا واری نا انتظار ءِ کریر و ویکسین خلفیر، وزیراعظم عمران خان ءِ ویکسین خلنگ آن مست انفیکشن مسوسس، بنجائی وزیر پارے کہ عمررسیدہ بندغ آتے ٹی ورناتا نسبت دین آن زہمی مننگ نا زیات چانس مریک، ہژدہ می ترمیم آن پد اسہ ٹیکہ اسکان خلتون پرائیویٹ کہول آ 18700وخت اس کہ سرکاری سینزدہ لکھ مخلوق ءِ ڈوز خلنگانے، داڑکن تینا واری ناانتظار ءِ کروئی تمک ہنداخاطرآن داڑآ تنقید بے گرج ءِ، اومستی پارے کہ اوناجند انا خیال اٹ پرائیویٹ سیکٹر ءِ ویکسین درآمد نا موکل مرے۔ تعلیمی ادارہ غاتا بند مننگ و ملنگ نا فیصلہ ءِ بین الصوبائی وزارتی کمیٹی کیک این سی ا و سی اوفتے بیرہ خطرہ غاتیان معلومدار کیک، اسہ وار کورونا نا گواچی بندغ آتے ٹی دُوارہ دین مننگ پنچ سد آن اسہ بندغ اسے ٹی چانس ءِ۔ دا دین آن مرک آتا کچ پنجا سال اٹی کم شست سال اٹی داکان زیات وخت اس کہ ہفتاد سال اٹی بھاز زیات ءِ۔ ننا الس آن خواست ءِ کہ او کم از کم تینا رجسٹریشن ءِ ضرور کرفر تانکہ ہندن ہندن ویکسین برے اوفتے خلنگے، داوخت آ پنجا سال آن زیات وئی نا ہفدہ لکھ بندغ ءُ ہرافک تینا رجسٹریشن ءِ کرفینو۔ داوخت آ صدر این پی سی شکیل انجم سیکرٹری این پی سی انور رضا ئسک ہم بنجائی وزیر ءِ نیشنل پریس کلب نا پروگرام میٹ دی پریس اٹ بشخ ہلنگ آ بخیر اٹ پاریر۔ داکان مست بنجائی وزیر اسد عمر نا نیشنل پریس کلب آ سرمننگ آ صدر این پی سی شکیل انجم سیکرٹری انور رضا جوائنٹ سیکرٹری ندیم چوہدری و ایلو سینئر صحافیک اودے جم و جوش اٹ بخیر کریر و اودے پھل آتا گلدستہ اس پیش کریر۔
