اسلام آباد۔ 13اپریل (اے پی پی) وزیراعظم نا خصوصی کمکار قومی جان جوڑی ڈاکٹر فیصل سلطان پارینے کہ کوویڈ۔ 19 آن بچفنگ کن ویکسین 90 آن 95 درسد اسکان کارآمد ءِ۔ سے شنبے نادے آ تینا ویڈیو کلہو اٹی او پارے کہ پاکستان اٹی داوخت آ ہراویکسین ءِ کورونا غان بچفنگ کن کاریم اٹ اتنگ انگ ءِ، او 90 آن 95 درسد اسکان کارآمد ءِ۔ اوپارے کہ کوویڈ۔ 19 آن بچفنگ کن مچ آ دنیا ٹی بھازانگا ویکسینک دوئی ءُ، دافتیان بھاز انگا ویکسینک ہندن ءُ ہرادنیانا مستند ادارہ غاتیان پک کروک ءُ۔ اوپارے کہ دافتیان مسہ ویکسین پاکستان اٹی ہم پک کروک ءُ ہرافتے پورو پت کرسا کاریم اٹ اتنگ کیرہ و تینے کوویڈ۔ 19 آن رکھ کننگ کیرہ۔ اوپارے کہ کیہی وار مخلوق بے سوب ویکسین نا رکھ مننگ نا پٹ وپول انا بناءِ کیک۔ اوپارے کہ غٹ آن اہم داگڑا ءِ ہُننگ نا گرج ءِ کہ ویکسین شدید ناجوڑی آن بچفنگ اٹ ہراحداسکان اثر تخک۔ اوفرنٹ لائن ہیلتھ ورکرآتیان پد ہراکہ ویکسین میسر مرے و تینا وئی نا رداٹ مخلوق ویکسین ضرور خلفر۔
