نوکیں مردم شماری ءِ کار مارچ 2023  ءَ تاں سرجم کنگ بیت، 2023 الیکشن نوکیں مردم شماری ءِ رد ءَ  نہ بوت گڈا کسانیں صوبگ آنی سروکی کم بیت، بنجاھی  وزیر اسد عمر ءِ پریس کانفرنس

اسلام آباد۔12اپریل  (اے پی پی): بنجاھی وزیر منصوبگ بندی  ءُ دیمروئی اسد عمر  ءَ گوشت کہ مردم شماری ءِ بنیاتی  فریم  ورک ءِ  سر ءَ 6 ءَ بگر تاں 8 ھپتگ آنی  تہ ءَ کار بیت ءُ ستمر یا اکتوبر ءَ نوکیں مردم شماری ءِ کار بندات بیت، نوکیں مردم شماری ءِ کار مارچ 2023 ءَ تاں سرجم کنگ بیت، مردم شماری الیکشن ءِ بنیات جوڑ بیت ءُ 2023 الیکشن  نوکیں مردم شماری ءِ رد ءَ نہ بوت گڈا کسانیں صوبگ آنی  سروکی کم بیت۔  "مشترکہ سیتی کونسل ءِ دیوان” ءَ چہ پد اسلام آباد ءَ رپریس کانفرنس ءَ گوں گشتانک دیان ءَ اسد  عمر  ءَ گوشت کہ مردم شماری ءِ ھوالگ ءَ کابینہ ءِ کمیٹی ھم جوڑ کنگ بوتگ ءُ آئی ءَ اے ھوالگ ءَ وتی سفارش ھم رد ءُ بند داتگ انت۔