اسلام آباد۔ 12اپریل (اے پی پی) وزیراعظم عمران خان پارینے کہ پاکستان سنگل ونڈوایکٹ 2021آن درآمدات و برآمد ات آتے ٹی آسانی مریک۔ دا پاکستان تحریک انصاف نا حکومت نا اسہ پین تاریخی ءُ اصلاحات اسے نا بشخ ءِ۔ دوشنبے نادے آ تینا ٹویٹ اٹی وزیراعظم پارے کہ داڑآن سالانہ 50 کروڑ ڈالر بچت مریک و 75 ریگولیٹری ڈیپارٹمنٹ ءِ سوگو کننگ نا کمک اٹ کارگوکلیئرنس نا دورانیہ دے تیان کم مرسا گھنٹہ غاتے ٹی سلک۔ اوپارے کہ اسہ آجو اتھارٹی پاکستان سنگل ونڈو نا بست وبند ءِ سنبھالک و دا جہانی راہداری و واپار کن مرکز اس جوڑ مننگ نا پاکستان نا لائخی ٹی ودکی کیک۔
