برلن۔ 12اپریل (اے پی پی) پاکستان و جرمن نا نیام اٹ ڈل آتا کہول آ مذاکرات دوشنبے نادے آ وزارت خارجہ برلن اٹی اڈ ہلک۔ پاکستانی ڈل انا کماشی ءِ وزیر خارجہ مخدوم شاہ محمود قریشی وخت اس کہ جرمن ڈل انا کماشی ءِ جرمنی نا وزیر خارجہ ہائیکو ماس کریکہ۔ مذاکرات اٹی ہڑتوم آ کنڈآتا تعلقداری، واپار، زرکاری، جان جوڑی، سیکورٹی، دفاع، تعلیم، سیل و سوات تون اوار کثیر الجہتی بشخ آتے ٹی ہڑتوم آ کنڈآتا کمکاری ءِ ودفنگ نا بابت سرجم گپ وتران مس۔ وزیر خارجہ مخدوم شاہ محمود قریشی پارے کہ پاکستان، جرمنی تون تینا ہڑتوم آ کنڈآتا سیاسی، سفارتی واقتصادی تعلقداری تے پین سوگو کننگ کن سنبرینگوک ءِ۔ اوپارے کہ پاکستان و جرمنی نا نیام اٹ تاریخی ہڑتوم آ کنڈآتا تعلقداری ءِ۔ شاہ محمود قریشی پارے کہ پاکستان تینا جغرافیائی سیاسی اولیت آتے جغرافیائی زرگزرانی اولیت آتے ٹی بدل کرینے۔ جرمنی دنیا نا اسہ اہم ءُ اقتصادی و سیاسی واک اسے۔ پاکستان و جرمنی نا نیام اٹ ہڑتوم آ کنڈآتا واپار و اقتصادی کمکاری ءِ ودفنگ نا بھلو وارخواہی اس ساڑی ءِ۔ شاہ محمود قریشی پارے کہ پاکستان، 22 کروڑ آبادی آ تالان اسہ مون آ بروک مارکیٹ اسے، ہراڑے واپار و زرکاری نا بے پناہ وارخواہی ساڑی ءِ، ننا حکومت پیشن نا زرکار و سیل و سواتی ای ویزہ تون اوار بھاز انگا آسراتی فراوان کننگ ءِ۔ وزیر خارجہ پارے کہ جرمن زرکار/کمپنی تے پاکستان اٹی زرکاری کن ہروڑنا کمک فراوان کیک۔ ڈل آتا کہول آ دامذاکرات اٹی، پاکستانی طالب علم، فیملی و بزنس ویزہ نا دوئی کننگ اٹ آسانی و سرعت ودی کننگ نا بابت خصوصی گپ وتران مس۔ وزیر خارجہ جرمنی ٹی رہینگوک آ پاکستانی تا دیرینہ خواہش، جرمن پاکستان دوہری شہریت نا دوئی کننگ آ ہم گپ وتران کرے۔ ہڑتوم آ وزیر خارجہ غاک کشمیر نا ویل، اوغان امن عمل تون اوار ڈیہہ ٹی امن و ایمنی نا جم حالیت آتیا ہم گپ وتران کرے۔ ہڑتوم آ وزیر خارجہ غاتا ہڑتوم آکنڈآتا واپار نا مون آ دننگ و کثیر الجہتی بشخ آتے ٹی ہڑتوم آ کندآتا کمکاری ءِ ودفنگ آ امنا کریر۔ وزیر خارجہ جرمن وزیر خارجہ جناب ہائیکو ماس ءِ زوت پاکستان نا دورہ ءِ کننگ نا سلہ خلک۔ جرمن وزیر خارجہ وزیر خارجہ مخدوم شاہ محمود قریشی نا منت واری ءِ ہرفے و خوشدلی اٹ دورہ پاکستان نا سلہ ءِ امنا کرسا زوت پاکستان آ بننگ آ عندیہ تس۔ اومیت ءِ کہ وزیراعظم عمران خان ہم زوت جرمنی نا دورہ ءِ کیک۔ اودے دورہ نا سلہ مہالو آن جرمن چانسلر انجیلا مرکل نا کنڈآن تننگانے۔
