سمندر آن ایپار پاکستانیک 9تُو اٹی 21.5ارب ڈالر نا زرمبادلہ مون تسر، غٹ آن زیات ترسیلات زر سعودی عرب آن مس، بنجائی وزیر خزانہ

اسلام آباد۔ 12اپریل (اے پی پی) بنجائی وزیر خزانہ، محصولات وصنعت و پیدوار محمد حماد اظہر پارینے کہ تدوک آ سال مارچ انا مقابلہ ٹی اینخو سال مارچ اٹی سمندر آن ایپار پاکستانی تا ترسیلات زر اٹی 43درسد ودکی مسنے۔ دوشنبے نادے آ تینا ٹویٹ اٹی اوپارے کہ برجامالی سال انا اولیکو 9 تُو اٹی سمندر پار رہینگوک آ پاکستانیک21.5ارب ڈالر نا زرمبادلہ ملک آ مون تسر ہراتدوک آ مالی سال انا ہندا مد انا مقابلہ ٹی 26.2درسد زیات ءُ۔ تدوک آ مالی سال انا ہندا مد اٹی پیشن نا ملک آتے ٹی رہینگوک پاکستانی تا ترسیلات زر انا کچ 17 ارب ڈالر ریکارڈ کننگاسس۔ اسٹیٹ بینک انا رداٹ جولائی آن ہلیس مارچ 2021ء اسکان نا مد اٹی سعودی عرب ترسیلات زر انا بابت غٹ آن بھلا ملک ثابت مسنے، سعودی عرب اٹی کاریم کروک آ پاکستانی خواری کش آک داوخت اٹی 5.731ارب ڈالر نا زرمبادلہ ملک آ مون تسر ہراتدوک آ مالی سال انا ہندا مد انا مقابلہ ٹی 20 درسد زیات ءُ۔ تدوک آ مالی سال انا اولیکو 9 تُو اٹی سعودی عرب اٹی کاریم کروک آ پاکستانی خواری کش آک 4.775ارب ڈالر نا زرمبادلہ ملک آ مون تسوسر، یواے ای دا فہرست اٹ ارٹ میکو ملک جوڑ مسنے، یواے ای ٹی رہینگوک آ پاکستانیک برجامالی سال انا اولیکو9 تُو اٹی 4.526ارب ڈالر نا زرمبادلہ ملک آ مون تسر۔ تدوک آ مالی سال انا ہندا مد اٹی یواے ای ٹی رہینگوک آ پاکستانیک 4.219ارب ڈالر نا زرمبادلہ ملک آ مون تسوسر، و امریکہ دا فہرست اٹ بالترتیب مسٹ میکو و چارمیکو نمبر آٹے۔ سٹیٹ بینک انا رداٹ فروری نا مقابلہ ٹی مارچ انا تُو اٹی ترسیلات زر اٹی 20 درسد ودکی مسنے۔