زرمبادلہ نا ملکی کوڑی تیٹی 9 تُو اٹی 9.49درسد ودکی مس، اسٹیٹ بینک

اسلام آباد۔ 12اپریل (اے پی پی) زرمبادلہ نا ملکی کوڑی تیٹی برجا مالی سال انا اولیکو9 تُو اٹی 9.49درسد نا ودکی ریکارڈ کننگانے۔ اسٹیٹ بینک انا حساب وکتاب نا رداٹ جون 2020ء نا ایسر آ زرمبادلہ نا ملکی کوڑی تا کچ 18.886ارب ڈالر ئس ہراٹی اسٹیٹ بینک اتون زرمبادلہ نا کوڑی تا کچ 12.132ارب ڈالر و بینک آتون زرمبادلہ نا کوڑی تا کچ 6.757ارب ڈالر ریکارڈ کننگاسس۔ اِرا اپریل 2021ء آ ایسر مروک آ ہفتہ ٹی ملکی زرمبادلہ نا کوڑی تا کچ 20.679ارب ڈالر ریکارڈ کننگا ہراٹی، اسٹیٹ بینک اتون زرمبادلہ نا کوڑی تا کچ 13.527ارب ڈالر و بینک آتون زرمبادلہ نا کوڑی تا کچ 7.152ارب ڈالر ریکارڈ کننگا۔ ایہن تو 9 تُو انا مد اٹی زرمبادلہ نا کوڑی تیٹی 9.49درسد نا ودکی مون آ بسنے۔