لاہور۔ 12اپریل (اے پی پی) وزیراعلیٰ پنجاب سردار عثمان بزدار تون بنجائی وزیر داخلہ شیخ رشید احمد اوڑدہی کرے۔ اوڑدہی ٹی تین پہ تینی است خواہی نا باندات آتیا گپ وتران کننگا و صوبہ ٹی امن و ایمنی نا حالیت آتیا گپ وتران مس۔ اوڑدہی ٹی راولپنڈی ناشونداری ڈٹ آتا جاچ ءِ ہلنگا و وقار النساپوسٹ گریجویٹ کالج راولپنڈی زالبول ءِ یونیورسٹی لیول اپ گریڈ کننگ آہم گپ وتران کننگا۔ وزیراعلیٰ عثمان بزدار وقار النساء پوسٹ گریجویٹ کالج ءِ یونیورسٹی نا درجہ تننگ آ امنا، پبی کمکاری نا باوری کرفے و نالہ لئی ایکسپریس وے پروجیکٹ آ ترند ترین پیش رفت نا گمان تا ہم جاچ ءِ ہلنگا۔ وزیراعلیٰ عثمان بزدار پارے کہ راولپنڈی نا شاری تیکن نالہ لئی ایکسپریس وے پروجیکٹ گیم چینجر اس جوڑ مریک۔نالہ لئی ایکسپریس وے پروجیکٹ آن ٹریفک اٹی کمتی بریک۔ اوپارے کہ راولپنڈی نا شار تے نالہ لئی ایکسپریس وے پروجیکٹ نا ٹیکی اس ضرور ایتنہ۔ راولپنڈی نا ایلو شونداری ڈٹ آتے زوت آن زوت ایسر اسکان سرکننگ کن کوشست کننگ ءِ۔ وزیراعلیٰ عثمان بزدار بنجائی وزیر شیخ رشید ءِ کورونا دین آن بچفنگ کن حکومتی گام گیج آتیان معلومدار کرے۔ داوخت آ وزیر داخلہ شیخ رشید احمد پارے کہ کورونا غان بچنگ کن حکومت پنجاب قابل قدر کوشست کننگ ءِ۔ اوپارے کہ الس نا راجی آسودہی کن بزدار حکومت نا گام گیج آک ستاکڑزرہ۔
