وزیراعظم عمران خان نا پوسکن آ پاکستان اپارٹمنٹس نا بنداو ءِ تخنگ نا دود آن تران

لاہور۔ 09اپریل (اے پی پی) وزیراعظم عمران خان پارینے کہ پاکستان اٹی مدینہ ریاست نا وڑآ کانود نا بالادستی، میرٹ و انسانیت نا آسودہی آ مبنی فلاحی ریاست نا تصور اس اتسا بننگ ءِ، خاص وڑاٹ راج انا نزور تپہ غاتے آسراتی فراوان کننگ آ چکارءِ، ملک اٹی تعمیرات نا بشخ انا شونداری آن روزگار نا وارخواہی، نیزگاری نا چٹفنگ و ملکی دولت اٹ ودکی مریک، بینک آتا کنڈآن اُراتیکن مورگیج نا آسراتی نا فراوانی نا کسر اٹ بروک اڑاند آتے مر کننگ کن عدلیہ تون اوار غٹ ادارہ غاتا کمک نا منت وار اُن، بیست ءُ یک می صدی نا چیلنج آتون مون تننگ کن نظام اٹ ساڑی خرابی تے چٹفوئی مریک۔ او جمعہ نادے آ داڑے پوسکن آ پاکستان اپارٹمنٹس نا بنداو نا دود آن تران کریکہ۔ وزیراعظم عمران خان داوخت آ حکومت پنجاب، وزیراعلیٰ، وزیر و چندی ادارہ غاتے خراج تحسین پیش کرسا پارے کہ نما غٹ انا مون آ ای تینا خوشی نا درشانی ءِ کننگ خواوہ، اینو نن ہرا جاگہ غا سرمسونن داڑکن بھلو کاریم اس کرینن، ”فورکلوژر“ کانود نا منظوری ٹی اِرا سال لگا، داڑکن عدلیہ نا منت واری ءِ ہرفیوہ، اگہ او کمک کتورہ تو دا کانود منظور متوکہ، کیہی سال آن دا کانود پدتموک ئس، داکانود نا منظوری آن پد بینک داسہ مورگیج نا آسراتی ءِ تننگ ءِ۔ وزیراعظم پارے کہ پاکستان اٹی کل آبادی نا 0.2درسد نا کچ آن مورگیج نا آسراتی تننگاکہ وخت اس کہ دیکی، امریکہ تون اوار ایلو ملک آتے ٹی دا کچ 80 درسد آن زیات ءِ۔ اوپارے کہ اگہ کس اسے تون نغد زر اف تو نئے او تینکن اُرااس ہلنگ کیک و نئے اُرااس جوڑ کننگ کیک، دنیا ٹی داڑکن بینک وام فراوان کیک ہراپیسہ کِرانا مد اٹ کاہک او اُرانا قسط آتے ٹی بدل مریک و اواُراہمو بندغ نا ملکیت جوڑ مریک۔ وزیراعظم پارے کہ داڑآن ہر بندغ ءِ اسہ موقع اس دوبسنے کہ او قسط ترسا تینا اُراءِ دوئی کننگ کے۔ داڈٹ ءِ عملی دروشم اس تننگ کن ایل ڈی اے، بینکنگ سیکٹر، عدلیہ تون اوار غٹ ادارہ غاک پبی کمک کریر۔ وزیراعظم پارے کہ ہرانظام اٹ بدعنوانی، برائی و اڑاند برے ہراڑے رشوت آن بیدس ہچ ءُ کاریم اس مف، اوبرائی تے چٹفنگ و دا نظام اٹ بدلی اتنگ اٹ وخت درکار مریک، سٹیٹس ءِ بدل کننگ اٹ وخت لگک۔ وزیراعظم پارے کہ ای تینا خن تا مون آ دانظام ءِ خراب مرسا خنانٹ، دادے بدل کننگ کن اسہ عزم و مصمم ارادہ اس درکار ءِ،دنیا ناکیہی ملک آک داوڑکرسا نشان تسر۔ اوپارے کہ لاہور ڈویلپمنٹ اتھارٹی خودکار نظام اس درستی راستی کرفسا اہم ءُ گام اس ہرفینے، کاروبار اٹ آسانی اتنگ کن دا گام المی ءِ، داڑآ ایل ڈی اے ءِ خراج تحسین پیش کینہ۔ وزیراعظم پارے کہ پوسکن آ پاکستان ہاؤسنگ اتھارٹی، جنرل وحید و اونا ٹیم تعمیراتی بشخ اٹ اڑاند آتے بھلو حداسسکان مرکرینو، ایف بی آر اتون اواری اٹ آسراتی و اسٹیٹ بینک اتون اواری اٹ لس مخلوق ءِ وام تننگ اٹ بروک مشکل آتے مرکریر، داکان مست لس مخلوق ءِ وام تننگ کن بینک تیار الوکہ۔