اسلام آباد۔ 09 اپریل (اے پی پی) بنجائی وزیر ڈٹ بندی شونداری و خصوصی گام گیج اسد عمر میرا سمبل جعفر اسلام آباد اٹی کورونا ویکسی نیشن کیمپ انا دورہ ءِ کرے، و بزرگ شاری تے انسداد کورونا ویکسین خلنگ نا عمل نا جاچ ءِ ہلک۔ اوشاری تیان عملہ نا رویہ و یکسینیشن نا بارواٹ اَریفے۔ بنجائی وزیر اسد عمر ویکسی نیشن کیمپ انا بست وبند آتے ہرسا ویکسینیشن کیمپ آ گچین بست وبند کننگ آ اسلام آباد انتظامیہ و قومی ادارہ جان جوڑی (این آئی ایچ) نا ٹیم انا خذمت آتا ستاءِ کرے۔ اوپارے کہ غٹ شاری تے گچین آب انا کورونا ویکسین خلنگ انگءِ۔ الس ءِ مرے کہ حکومت نا کنڈآن تروک آ دا آسراتی تیان فائدہ ہرفسا تینا باری آ ویکسینیشن خلفر، داوڑکننگ آن انشاء اللہ پاکستانی قوم زوت دا دین آن جان ءِ چٹفک۔ اوالس ءِ خاص پارت کرے کہ کورونا نا بات ایس او پی تیا عمل کیر و خاص وڑاٹ ماسک انا کاریم اٹ اتنگ ءِ پک کیر۔ شاریک بنجائی وزیر اسد عمر ءِ گچین بست وبند کننگ آ دعا تسر و است جمی نا درشانی ءِ کریر۔
