اسلام آباد۔ 09اپریل (اے پی پی) پاکستان و چین کثیر الجہتی اصول آتا رکھ، جہانی امور اٹی اقوام متحدہ نا مرکزی کڑد انا مخ تفی و علاقائی و جہانی وڑنا اہم باندات آتا سیاسی و پرامن ایسری کن اواری اٹ کاریم کننگ آ امنا کرینو۔ داامنائی تدوک آ دے اقوام متحدہ نا امور نا بابت پاک چین سلابت نا مسٹ میکو دور اٹی مس۔ جمعہ نادے آ دفترخارجہ نا رداٹ سلابت اٹی ڈائریکٹر جنرل وزارت خارجہ امور، عثمان اقبال جدون پاکستانی وخت اس کہ جہانی تنظیم و کانفرنس آتا بشخ انا ڈائریکٹر جنرل یانگ تاؤ چینی ڈل انا کماشی ءِ کریکہ۔ پاکستان اٹ چینی سفارتخانہ، چین اٹی پاکستانی سفارتخانہ، نیویارک و جنیوا ٹی اقوام متحدہ ٹی چی و پاکستان نا آخبتی مشنک ہم دیوان اٹی بشخ ہلکر۔ ورچول دیوان اٹی اقوام متحدہ نا غٹ بشخ آتے ٹی تین پہ تینی است خواہی نا کثیر الجہتی امور آ سرجم گپ وتران مس۔ فریق آک اقوام متحدہ و ایلو کثیر الجہتی فورم تے ٹی تینا کمکاری ءِ سوگو کننگ و اسہ ایلو نا بنداوی فائدہ غاتیا اسہ ایلو نا مخ تفی ءِ کننگ آ امنا کریر۔ اوفک علاقائی و جہانی وڑنا اہم باندات آتا سیاسی و پرامن ایسری کن اواری اٹ کاریم کننگ و دنیا خاص وڑاٹ ایشیاٹی امن و سوگوی نا رکھ ءِ کننگ نا فیصلہ ہم کریر۔ ہڑتوم آ ملک آک جہانی و علاقائی امن و سلامتی نا غرض اٹ اقوام متحدہ نا پلیٹ فارم آ دہشت گردی نا چٹفنگ و امن نا چرجوئی ٹی کمکاری ءِ پین سوگو کننگ آ امنا کریر۔ فریق آک انسانی حق انا بشخ اٹی اسٹریٹجک ہم آہنگی ءِ سوگو کننگ، دوآبہ و انسانی حق انا امور ءِ سیاسی رنگ تننگ نا مخالفت ءِ کننگ و تین پہ تینی کمکاری اٹ غٹ انسانی حق انا مون آ دننگ و رکھ اکن کاریم کننگ نا ہم فیصلہ کریر۔
