اسلام آباد۔ 08اپریل (اے پی پی) وزیراعظم عمران خان پارینے کہ الس ءِ تینا اُراتا فراوانی نا قول ءِ پورو کینہ، تعمیراتی بشخ ءِ تروک آ پیکج و آسودہی تا بھرم مون آ بننگ بناکرینے، زرگزرانی سرجزآک ترند مسنو۔ داخیال آتا درشانی ءِ او پنچ شنبے نادے آ پوسکن آ پاکستان ہاؤسنگ اسکیم نا رداٹ فراش ٹاؤن اٹی اپارٹمنٹ آتا بنداو ءِ تخنگ نا دود آن تران کرسا کرے۔ داوخت آ بنجائی وزیر داخلہ شیخ رشید احمد، سی ڈی اے، ایف ڈبلیو او و پوسکن آ پاکستان ہاؤسنگ نا کمامدارآک ہم ساڑی ئسر۔ وزیراعظم پارے کہ اینو کنے بھاز خوشی مننگ ءِ کہ ہراڈٹ انا نن داخہ وخت آن تیاری ءِ کرینہ اوڑآ کاریم بناکرینے۔ وزیراعظم پارے کہ نن مارگیج فنانسنگ کن بینک آتون مذاکرات کرین، انفراسٹرکچر جوڑ کرفین تانکہ لس بندغ ءِ اُراتا تفنگ کن اڑزآن وام ملنگ کے و نیزگار بندغ ہم تینا اُراتا مالک مننگ کے، داسہ ہاؤسنگ نا اسکیم و بینک ہم وام تننگ آ تیار مسنو، فراش ٹاؤن اٹی 2سال اٹ مخلوق ءِ فلیٹ تفسا تننگک، داڈٹ آ ایف ڈبلیو او و پوسکن آ پاکستان ہاؤسنگ ءِ مبارکبادی ایتیوہ۔ وزیراعظم پارے کہ بینک لس بندغ ءِ اُراتا تفنگ کن وام تتوکہ، داسہ ہم بینک آتا شیفکو اسٹاف نا کنڈآن گڑاس اڑاند ودی کننگک ہرافتے مر کننگ انگ ءِ۔ سی ڈی اے ءِ مبارکبادی ایتیوہ ہرا پوسکن آ پاکستان ہاؤسنگ کن بھاز کاریم کرینے، نن سی ڈی اے ٹی ون ونڈو آپریشن و آٹومیشن نا کنڈآ ہِننگ اُن، مخلوق ءِ موکل نامہ غاتا دوئی کننگ کن بھاز مشکل آتون مون تروئی تماکہ، آٹومیشن و ون ونڈو آپریشن آن اوفتا مشکل آک کم مریرہ۔ وزیراعظم داگمان نا درشانیءِ کرے کہ ہراوڑ ایف ڈبلیو او ریکارڈ مداٹ کرتارپور راہداری نا ڈٹ ءِ پورو کرے ہنداوڑ پوسکن آ پاکستان ہاؤسنگ نا دا ڈٹ ءِ ہم ریکارڈ مدت اٹ پورو کننگک۔ وزیراعظم پارے کہ پوسکن آ پاکستان ہاؤسنگ نا رداٹ ا ڈٹ انا کمک اٹ اول 2ہزار فلیٹ داتپہ ءِ تننگک ہراوخت اس ہم تینکن اُراجوڑ کننگ نا سجفتوسہ ہم،دافک بیرہ تینا اُرانا تغ ءِ ہُننگ کریرہ۔ دااسکیم نا کمک اٹ ہمو ہرا پیسہ غاتے اُرانا کِرا نا مد اٹ تسرہ ہموفتے بینک آتا وام تا حالیت اٹ ترسا تینا اُرانا ماملک جوڑ مریرہ، دا ڈٹ لس مزور، مکینک، ویلڈر کون آ خواری کش تپہ غاتیکن ءِ، ہرافتے تون تینا اُرااس جوڑ کننگ کن پیسہ متوکہ، نن بزغر آتیکن ہم ہنکینی ڈٹ اس اتینہ۔ وزیراعظم پارے کہ حکومت شیفکو تپہ ءِ اُرانا فراوانی کن 3لکھ روپئی نا سبسڈی تننگ ءِ۔ سی ڈی اے 600اُراکچہ انگا آبادی نا مخلوق ءِ تننگ ءِ، کس اس داباروٹ سجفتویسس ہم، دا غیر کانودی کچہ انگا آبادی تیٹی سیوریج سسٹم ءِ نئے کنوئی آ ساف دیر، نن کچہ انگا آبادی تے بدل کینہ و اوفتے مالکانہ حق ایتنہ۔ وزیراعظم پارے کہ پاکستان وام تیٹی ڈبینگوک ءِ، ہرسال وام تا قسط آک ودرہ، مستین ملک انا زرگزران ءِ سہی کننگ نا جاگہ غاہندن ءُ وام ہلنگا ہرافتیان دولت اٹ ودکی نا جاگہ غا پین وامک زیات مسر۔ نن ملک اٹ دولت نا پیدوار ءِ ودفنگ آ چکار کینہ تانکہ وام تا قسط آتے پدی تننگ کین۔ اوپارے کہ ہاؤسنگ نا بشخ انا شونداری آن 30 آن زیات صنعت آک بڑزاکارہ، تعمیراتی بشخ ءِ تروک آ ننا پیکج نا اثرآک مون آ بننگ ءُ۔ ملک اٹ تدوک آ تُو سرمٹ نا ریکارڈ بہامسنے و ایف بی آر تدوک آ تُو غٹ آن زیات خراج یکجا کرینے، دا ملک اٹی زرگزرانی سرجز آتا مون آدننگ نا نشانی ءِ۔ ن لیگ دونیم سال اٹی 20ہزار ارب وام تا قسط و سود انا مد اٹ ادا کرینے، نن دونیم سال اٹی 71 ہزار ارب روپئی نا وام و وام تا قسط آتے پدی تسن۔ اگہ ننے دا پیشن نا وام تے پدی تروئی مفروسس تو نن دا پیسہ غاتے تعلیم، جان جوڑی و انفراسٹرکچر نا شونداری آ خلوسن تو بھاز مون آ ہنانہ سرمسنہ۔ لاہور اٹی راوی اربن پروجیکٹ، سنٹرل بزنس ڈسٹرکٹ کون آ و سندھ اٹی ارب آ کھرب روپئی نا درملکی زرکاری نا ڈٹ اتنگ اُن، ہرافتیان ملک اٹی ڈالر بریک۔ پاکستان اٹی اِرابھلو ڈیم جوڑ مننگ ءِ ہراڑآن نئے بیرہ کشاری پیدوار ودک بلکن اڑزآن بجلی دوئی مریک و دولت اٹ ودکی آن نن نئے بیرہ وام تے پدی تننگ نا قابل مرینہ بلکن شونہالی بریک۔ وزیراعظم پارے کہ حکومت چین اتون اواری اٹ ایم ایل ون پوسکن ءُ ریلوائی ڈٹ اس ایسونے۔ داڑآن کراچی و لاہور نا نیام اٹ سفر بیرہ 8 گھنٹہ نا مریک و فریٹ و کار گو سروس گچین مریک و کاروبار اٹی آسانی بریک۔ دا ٹرین پشاور آن مون آ ازبکستان و سنٹرل ایشیااسکان کاہک۔ اوغانستان تون داسہ دا چرجوئی ٹی ہیت وگپ کننگ اُن۔ وزیراعظم پارے کہ نن ملک اٹی زرگزرانی سرجزآتا مون آ دننگ نا حالیت دادے کہ ٹیکسٹائل نا صنعت ءِ داوخت آ افرادی قوت ملپننگ ءِ و خام مال کم مسنے، حکومت سمال اینڈ میڈیم انڈسٹری ءِ شون تننگ ءِ۔ وزیراعظم سی ڈی اے، پوسکن آ پاکستان ہاؤسنگ و ایف ڈبلیو ءِ خراج تحسین پیش کرسا دااومیت نا درشانی ءِ کرے کہ او دا ڈٹ ءِ ریکارڈ مد اٹ پورو کیک تانکہ حکومت نا الس ءِ تینا اُراتننگ نا قول زوت پورو مننگ کے۔
