اسلام آباد۔ 08اپریل (اے پی پی) بنجائی وزیر انسانی حق ڈاکٹر شیریں مزاری پارینے کہ وزارت انسانی حق جرمانہ نا زرتفننگ نا سوب آن زندان تیٹی بند بے سیبو بندی تے یلہ کننگ اٹ کمک فراوان کننگ کن اہم ءُ مزل اس دوئی کرینے۔ پنچ شنبے نادے آ تینا اسہ ٹویٹ اسے ٹی او پارے کہ تدوک آ دے وزارت انسانی حق اٹ دیوان اس اڈ ہلک ہراٹی غٹ صوبہ غاتا ہوم سیکرٹریک بے سیبو بندی تیکن ارش، دیت و دامان فنڈ انا ادائیگی نا معاملہ غا بشخ ہلکر۔ اوپارے کہ دا ہمو بندیک ءُ ہرامعذوری، نیزگاری یا پیر مننگ نا سوب آن عدالت آتا کمک اٹ عائد جرمانہ نا زرتفننگ کپسہ ہرانا سوب آن اوفک زندان تیٹی بند ءُ۔ اینو نن ارش، دامان و دیت فنڈ انا رداٹ ادائیگی کن پنجاب و کے پی کے 12بے سیبو بندی تا یلہ کننگ کن 15 ملین روپئی نا اصولی منظوری ءِ تسونن۔ اوپارے کہ سندھ و بلوچستان نا ہوم سیکرٹریک ہم صوبائی جیل کمامدارآتون حساب وکتاب ءِ دوئی کننگ آن پد اہل بے سیبو بندی تا مقدمہ غاتے زوت گدریفنگ نا قول کرینو۔ اوپارے کہ نن اوفتیان خواست کرینن کہ او داعمل ءِ ترند کیر۔
