اسلام آباد۔ 08اپریل (اے پی پی) اینخو مالی سال انا اولیکو 8 تُو اٹی مصالحہ غاتا برآمد آتے ٹی 8.20درسد ودکی مسنے۔ ادارہ شماریات پاکستان (پی بی ایس) نا حساب وکتاب نا رداٹ برجامالی سال اٹی جولائی آن فروری 2020-21ء ٹی برآمد آتا کچ 61.494ملین ڈالر اسکان ودا وخت اس کہ تدوک آ مالی سال اٹی جولائی آن فروری 2019-20ء ٹی مصالحہ غاتا برآمد آتیان 56.836ملین ڈالرز زرمبادلہ کٹیا کننگاسس۔ ہنداوڑ تدوک آ مالی سال انا مقابلہ ٹی اینخو مالی سال انا اولیکو 8 تُو اٹی مصالحہ غاتا قومی برآمد آتے ٹی 4.658ملین ڈالر یعنی 8 درسد آن زیات ودکی ریکارڈ کننگانے۔ پی بی ایس نا رداٹ داٹی بالحاظ وزن ہم مصالحہ غاتا برآمدآک 10.70درسد ودکی آن 13 ہزار 754میٹرک ٹن انا مقابلہ ٹی 15 ہزار 226میٹرٹن اسکان ودار۔ داڑے فروری 2020ء نا مقابلہ ٹی فروری 2021ء ٹی مصالحہ غاتا برآمد آتے ٹی 9.70درسد ودکی مس و فروری 2020ء نا 8.209ملین ڈالر برآمد آتا مقابلہ ٹی برآمد آتا مالیت 9.005ملین ڈالر اسکان ودا۔ ایلو کنڈآ جنوری 2021ء نا مقابلہ ٹی فروری 2021ء ٹی مصالحہ غاتا ملکی برآمد آتے ٹی 18.34درسد نا کمتی ریکارڈ کننگانے۔ یات سلے کہ جنوری 2021ء ٹی برآمد آتا کچ 11.027ملین ڈالر مسوسس ولے فروری 2021ء ٹی مصالحہ غاتا قومی برآمدآک 9.005ملین ڈالر اسکان کم مسر۔
