اسلام آباد۔ 07اپریل (اے پی پی) وزیراعظم عمران خان پارینے کہ اوغان تصفیہ نا سیاسی ایسری نا گرج ءِ، رشین فیڈریشن تون واپار، ریلوائی، ہوابازی تون اوار ایلو بشخ آتے ٹی کمکاری نا خواہندار اُن۔ چارشنبے نادے آ پاکستان نا ودرہ غا بروک آ روسی فیڈریشن نا وزیر خارجہ سرگئی لاروف وزیراعظم عمران خان تون اوڑدہی کرے۔ اوڑدہی ٹی پاک روس ہڑتوم آ کنڈآتا تعلقداری و علاقائی و جہانی اہمیت نا باندات آ گپ وتران کننگا۔ وزیراعظم جون اٹ بشکیک اٹی شنگھائی کمکار تنظیم نا سرکڑدہ ئی دیوان نا وخت آ صدر ولادیمیر پیوٹن تون تینا اوڑدہی نا ذکر ءِ کرے۔ ہراڑے او ہڑتوم آ کنڈآتا تعلقداری تے اسہ پوسکن ءُ کہول اسے آ دننگ نا خواہش آ زور شاغاسس۔ وزیراعظم اسہ اہم خارجہ پالیسی نا اولیت نا وڑاٹ روس اتون تینا تعلقداری تا اہمیت نا درشانی ءِ کرے۔ اوہڑتوم آ کنڈآتا تعلقداری ٹی سوگوی آ است جمی نا درشانی ءِ کرے، ہراٹی واپار، توانائی، سلامتی و دفاع ٹی کمکاری اوار ءِ۔ وزیراعظم ”پاکستان اسٹریم“ (قطبی سویل) گیس پیپ لین ڈٹ اکن درکار کانودی عمل ءِ ترندی اٹ پورو کننگ و زوت آن زوت کاریم نا بناءِ کننگ نا پاکستان نا عزم انا درشانی ءِ کرے۔ اوڑدہی ٹی توانائی، صنعتی جدت، ریلوائی و ہوابازی نا بشخ آتیٹی ہڑتوم آ کنڈآتا کمکاری ءِ ودفنگ آ گپ وتران کننگا۔ اوڑدہی ٹی داہیت آ امنا کننگاکہ داسال انا ایسر اٹ ماسکو ٹی مروک آ بین الحکومتی کمیشن(آئی جی سی) دارداٹ مخصوص سلاہ و ڈٹ آتے خڑک اٹ پیش کیک۔ کوویڈ۔ 19 دینی مرض آتا کمک اٹ مون تروک جان جوڑی و زرگزرانی چیلنج آتیا گپ وتران کننگا۔ وزیراعظم روس ءِ کورونا ویکسین جوڑ کننگ آ مبارکبادی تس و دارداٹ پاکستان نا ڈٹ آتیا زور شاغا۔ وزیراعظم اوغان تنازعہ نا گپ وتران اٹ سیاسی تصفیہ نا اہمیت آ زور شاغا۔ ماسکوٹی ساڑی آ دیوان نا مہمانداری نا کمک اٹ پاکستان اوغان امن عمل ءِ مون آ دننگ اٹ روس انا کوشست آتا ستا ءِ کرے۔ بھارتی غیر کانودی کوزہ ٹی کشمیر(آئی او جے کے) نا حالیت آتا بابت وزیراعظم جموں و کشمیر تنازعہ نا پرامن ایسری نا گرج اتون اوار سویلی ایشیاء ٹی امن و سلامتی نا امور آ پاکستان نا نقطہ نظرآن معلومدار کرے۔ دیکی ایشیاء، خلیج، دے ٹک نیامی و ایشیابحرالکاہل نا ڈیہہ نا حالیت آتیا ہم گپ وتران کننگا۔ وزیراعظم صدر پیوٹن ءِ دورہ پاکستان نا سلہ نا درشانی ءِ کرے۔
