اسلام آباد۔ 07اپریل (اے پی پی) وزیر خارجہ مخدوم شاہ محمود قریشی پارینے کہ پاکستان ڈی ایٹ فورم ءِ خاص اہمیت ایتک، ننے دنیا نا بدل مروک آ اولیت آتیکن و چیلنج آتون مون تننگ کن تینے تیار کروئی مریک۔ داہیت ءِ او چارشنبے نادے آ بنگلہ دیش اٹی 19می ڈی ایٹ وزارتی کونسل نا دیوان آن ویڈیو لنک انا کمک اٹ تران کرساپارے۔ ڈی ایٹ ورچوئل دیوان اٹی مصر، پاکستان، بنگلہ دیش، سری لنکا، انڈونیشیا، ملائیشیا، نائیجیریا و ترکی اوار ءُ۔ وزیر خارجہ ڈی ایٹ وزارتی کونسل نا ورچوئل دیوان آن ”بدل مروک آ دنیا کن شریداری‘ یوتھ و ٹیکنالوجی نا اہمیت“ نا سرحال آ تران کرسا پارے کہ اینو نن ہراڑے ٹیکنالوجی نا شون ءِ ہُننگ اُن ہموڑے غیر مساوی وارخواہی تا دنیا ہم ننا مون آٹے۔ کورونا دین انا جہانی دین انا حالیت آک دا تفاوت ءِ پین ودفینو۔ اوپارے کہ بھازانگا پدتموک ملک آتا جہانی اقتصادیات، جہانی سپلائی چین و تعلیم نا بشخ اٹی ساڑی گری بھاز کم ءِ، دا تفاوت، نئے بیرہ ہزگار و نیزگار ملک آتا نیام اٹ پرخ ءِ ودفک بلکن ورناچین نا حوصلہ شکنی نا ہم سوب ءِ۔ وزیر خارجہ پارے کہ ننا آخبت نا دارومدار ننا ورناچین تیا ٹی ءِ، ننا آبادی نا 60 درسد بشخ ورناتیا تالان ءِ۔ نن اوفتے پوسکن آ ٹیکنالوجی آن بہرہ ور کننگ کن کوشست کننگ اُن۔ وزیر خارجہ پارے کہ نن پاکستانی ورناتے تعلیم و روزگار نا وارخواہی ترسا وتواجہ جوڑ کننگ کن گام گیج کننگ اُن۔
