وزیراعلیٰ بلوچستان جام کمال نا پلیری نگور شریف نا دورہ، پلیری نگور شریف لنک روڈ انا منظوری ءِ تس، چیف سیکرٹری بلوچستان ہم اوڑتون اوار ئس

کوئٹہ۔ 07اپریل (اے پی پی) وزیراعلیٰ بلوچستان جام کمال مسکوہی نگران صوبائی وزیر بلوچستان عوامی پارٹی گوادر نا ہردلعزیز راہشون میر نوید کلمتی تون اوار پلیری نگور شریف نا دورہ ءِ کرے۔ داوخت آ چیف سیکرٹری بلوچستان رانا مطہر نیاز، ایڈیشنل چیف سیکرٹری ترقیات حافظ عبدالباسط، صوبائی سلاہکار فشریز حاجی میر اکبر آسکانی، صوبائی وزیر پی ایچ ای نور محمد دمڑ، کمشنر مکران و ڈپٹی کمشنر گوادر میجر ریٹائرڈ عبدالکبیر زرکون، فشرمین کوآپریٹیو سوسائٹی نا وائس چیئرمین اشرف اقبال بلوچ، عبدالستار و ایلوفک اوڑتون اوار ئسر۔ پلیری نگور شریف نا بزرگ روحانی شخصیت شیخ علی و شیخ جمیل نا کماشی ٹی علاقہ مکین آک وزیراعلیٰ و ایلو مہمان تے بخیر کریر۔ داوخت آ شیخ علی وزیراعلیٰ جام کمال نا پلیری نگور شریف آ بننگ آ خوشی نا درشانیءِ کرسا پارے کہ جام کمال تینا باوہ و پیرہ نا روایت آتا پاسداری ءِ کرینے جام غلام قادر ایماندار و جام یوسف ایماندار آن پد جام کمال پلیری نگور شریف نا مخلوق تون پیڑی تیان جوڑ تعلق ءِ پی سوگو کرے، جام خاہوت تون مستین اٹ ہم نگور شریف گوادر نا مخلوق نا ہرا روحانی رشتہ مسنے او وونٹ انا سیاست آخا بلکن عقیدت عزت و شرف و بلوچی روایت آتا پاسداری نا ءِ۔ داوخت آ میر نوید کلمتی علاقہ پلیری نگور شریف نا مخلوق نا ویل و کنٹانی دربارڈر نا بندش آن علاقہ ٹی بے روزگاری کنوئی آ گڑاتا کاختی، مڈل اسکول و گرلز پرائمری اسکول، بیسک ہیلتھ یونٹ نا اپ گریڈیشن واٹرٹینکس انا جوڑ جاڑ و ڈغار تا اسٹلمنٹ زوت کرفنگ رکھی بندآتا جوڑ جاڑ کن بلڈوزر گھنٹہ غاتا فراوانی و ایلو معاملہ غاتیان وزیراعلیٰ بلوچستان جام کمال ءِ معلومدار کرے۔ وزیراعلیٰ ویل آتا ایسری کن وخت آ پرمان جاری کرے، وزیراعلیٰ پارے کہ پلیری نگور شریف نا درگاہ و بزرگ ہستی تتون پیڑی تیان جوڑ روحانی تعلق ءِ پین سوگو کینہ، وزیراعلیٰ بلوچستان جام کمال پارے کہ نوید کلمتی نا سلاہ آ پلیری نگور شریف لنک روڈ انا منظوری ءِ تسنے فنڈ آتا اتھارائزیشن ءِ زوت جاری کننگک۔ وزیراعلیٰ میر نوید کلمتی نا سلاہ غا نگور شریف پلیری آن پشکان اسکان لنک روڈ انا تفنگ و علاقہ ٹی رہینگوک آتا ویل آتے اولیتی بنداو تیا ایسر کننگ نا باوری کرفے۔ وزیراعلیٰ پارے کہ کنٹانی در بارڈر ءِ ملنگ کن تعلقدار کمامدارآتون رابطہ کرسا ہندی مخلوق ءِ ریلیف ترفینہ۔