اسلام آباد۔ 07 اپریل (اے پی پی) قومی احتساب بیورو نا چیئرمین غٹ ڈائریکٹر جنرل آتے پارت کرینے کہ غیر کانودی ہاؤسنگ سوسائٹی و کوآپریٹیو سوسائٹی تا برخلاف نیب اٹی برجا جاست وپاست ءِ تخوک آ وخت اٹ پورو کننگے۔ داخیال آتا درشانی ءِ او نیب ہیڈکوارٹرز اٹی اسہ دیوان اسے نا کماشی ءِ کرسا کرے۔ دیوان اٹی نیب انا غٹ علاقائی بیورو تیٹی غیرکانودی ہاؤسنگ کو آپریٹیو سوسائٹی تا بابت برجا نیب انا داتم اسکان نا جاست وپاست آتا جاچ ءِ ہلنگا۔ دیوان اٹی پاننگاکہ نیب انا علاقائی بیورو تیٹی غیر کانودی ہاؤسنگ کو آپریٹیو سوسائٹی تا بابت جاست وپاست اٹ زہمی تے ارب آ روپئی نا زر نئے بیرہ پدی تننگانے ہراڑآ زہمیک غیر کانودی ہاؤسنگ کو آپریٹیو سوسائٹی تیان اوفتا پلوک آ زر آتا باعزت واپسی آ چیئرمین نیب جسٹس جاوید اقبال نا منت واری ءِ ہرفے۔ دیوان اٹی پاننگاکہ گڑاس ہاؤسنگ کوآپریٹیو سوسائٹی تعلقدار ریگولیٹرز آن لے آؤٹ پلان و این او سی نا منظوری و درکار ڈغار مفننگ آن بیدس نئے بیرہ پرکشش تشہیری مہم نا کمک اٹ الس ءِ مبینہ وڑاٹ درو انا کمک اٹ پُلنگ و جعلی فائلز سودا کننگ اٹ اختہ ءُ ہراکہ ہاؤسنگ سوسائٹی تا کانود نا نئے بیرہ خلاف ورزی ءِ بلکن تعلقدار شارتا ریگولیٹر آتا مبینہ خاموشی و کانود نا رداٹ دوئی واکداری تا کاریم اٹ اتپننگ و فرض آن ڈیوالئی نا زمرہ ٹی بریک۔ چیئرمین نیب جسٹس جاوید اقبال نیب انا غٹ ڈی جی تے پارت کرے کہ غیر کانودی ہاؤسنگ سوسائٹی وآپریٹیو سوسائٹی تا برخلاف نیب اٹ برجا جاست وپاست ءِ تخوک آ وخت اٹ پورو کننگے تانکہ زہمی تے اوفتا مچ آ زند انا پلوک آ زر ءِ پدی تننگ مرے۔
