اسلام آباد۔ 07اپریل (اے پی پی) پاکستان و روس انا وزیر خارجہ غاک اقتصادی، واپاری و دفاعی تعلقداری تا مون آ دننگ ءِ اولیت گوندسا پارینو کہ ہڑتوم آ ملک آتا نیام اٹ واپار اٹی 2020آن 46درسد ودکی مسنے، روس انا شریداری اٹ سپٹنک 5ویکسین نا ہندی کہول آ تیاری آ سجفنگ اُن۔ روس ءِ ڈیہہ و جہانی پژدر اٹ سوگوی نا سوب تکنہ۔ انسداد دہشت گردی نا بشخ اٹی ہڑتوم آ کنڈآتا کمکاری ءِ مون آ دننگک۔ چارشنبے نادے آ وزارت خارجہ ٹی ڈل آتا کہول آ مذاکرات آن پد وزیر خارجہ مخدوم شاہ محمود قریشی و اونا روسی ہم منصب سرگئی لاروف اسیجائی پریس کانفرنس کریر۔ وزیر خارجہ مخدوم شاہ محمود قریشی پارے کہ روس اتون ننا تعلقداری پوسکن ءُ جہد اس اختیار کننگ ءِ و پوسکن آ بڑزی تا کنڈآ ہِننگ ءِ۔ روس اتون کثیر الجہتی سوگو تعلقداری تے استوار کننگ پاکستان نا خارجہ پالیسی نا اہم اولیت ءِ۔ ننا جغرافیائی سیم آن مون آ واقع روس ءِ نن ڈیہہ و جہانی پژدر اٹ سوگوی نا سوب تکنہ۔ اوپارے کہ روس اقوام متحدہ نا مرکزیت و جہانی کانود و کثیر القومیت نا بنداوی نا پبی مبلغ ءِ۔ دااست جمی نا سوب ءِ کہ پاکستان و روس انا نیام اٹ ہڑتوم آ کنڈآتا تعلقداری پت و ہم گرنچی تون گنڈوک ءِ۔ ننا اقوام متحدہ تون اوار جہانی فورم تیا گچین کمکاری ءِ و نن دادے پین سوگو کننگ اُن۔ وزیر خارجہ پارے کہ ننا ہڑتوم آ کنڈآتا تعلقداری ٹی اہم ءُ پیش رفت اس مسنے و نن اسہ وڑ فائدہ تخوک کمکاری ءِ پین گہراکننگ نا خواہندار اُن۔ ننا واپاری تعلقداری ٹی تدوک آ سال پین ودکی مسنے۔ اینو ننا گپ وتران اٹی نن ہڑتوم آ کنڈآتا تعلقداری تا غٹ پلو آتیا گپ وتران و خیال آتا درشانی ءِ کرین کہ دا تعلقداری تے پین زیات تحریک و سوگوی ہراوڑ ملنگ کیک۔ نن ہمووڑوڈول آتیا سجفین ہراڑآن واپار تون اوار ہڑتوم آ کنڈآتا زرگزرانی تعلقداری تے پین مون آ دننگ دوئی مرے۔ وزیر خارجہ پارے کہ نن امنا کرینن کہ پاکستان و روس بین الحکومتی کمیشن نا بروک آ دیوان کورونا دین انا بابت پابندی تا نرم مننگ تون زوت بٹنگ انگے، نن ’نارتھ ساؤتھ گیس پیپ لین‘ ڈٹ اتون اوار توانائی نا بشخ اٹی کمکاری آ پیش رفت و انسداد دہشت گردی و دفاع تون اوار سیکورٹی نا بشخ اٹی ننا نیام اٹ کمکاری نا ہم جاچ ءِ ہلکن۔ وزیر خارجہ پارے کہ کنے خوشی ءِ کہ روسی وزیر خارجہ دہشت گردی نا برخلاف پاکستان نا کوشست آتا ستاءِ کرے، نن ’ملٹی لیٹرل‘ ایجنڈانا زیات تر امور آ پاکستان و روس انا موقف اٹ مماثلت خنان۔ اوغانستان نا بابت نن امنا کرین کہ ڈیہہ ٹی امن و سوگوی کن اوغانستان اٹی امن و سوگوی بھاز المی ءِ۔ نن اوغان سرکڑدہ ئی ٹی اوغان تے قابل قبول امن عمل کن ننا مخ تفی نا درشانی ءِ کرین۔ شاہ محمود قریشی پارے کہ ای وزیر خارجہ لاوروف ءِ تدوک آ تُو ماسکو ٹی اوغانستان آ”ایکسٹینڈ ڈٹرائیکا دیوان‘ نا سرسہب اڈتننگ آ مبارکبادی تسٹ و بھارت نا کوزہ ٹی جموں و کشمیر اٹی انسانی حق انا بگڑینگوک آ حالیت آتیا پاکستان نا نکتہ نظر آن معلومدار کریٹ۔داکان بیدس ای اودے پاکستان و بھارت نا نیام اٹ 2003ء نا سیز فائر معاہدہ نا ہڑتوم آ کنڈآتا پاسداری نا بابت معلومدار کریٹ۔ شاہ محمو دقریشی پارے کہ نن روس انا تیار کروک سپٹنک 5ویکسین ءِ پاکستان اٹ رجسٹرڈ کرینن۔ دا ویکسین نا جوان ءُ نتیجہ اس مون آ بننگ ءِ۔ روس جان جوڑی نا آسراتی تا بابت اسہ ایڈوانس ءُ ملک اسے۔ پاکستان، روس انا شریداری اٹ دا ویکسین نا ہندی کہول آ تیاری نا پلو آتیا سجفنگ ءِ۔ روس انا وزیر خارجہ سرگئی لاروف پارے کہ نن پاکستان ءِ پنجا ہزار ڈوز تسونن پین اسہ لکھ پنجا ہزار ڈوز تننگ نا ارادہ تخنہ، روسی وزیر خارجہ پارے کہ نن کورونا ویکسین نا بابت پاکستان تون کمکاری ءِ برجاتخنہ۔ سرگئی لاروف پارے کہ نن ہڑتوم آ کنڈآتا واپار نا کچ اٹی ودکی نا خواہندار اُن۔ نن پاکستان تون اوار اوار نارتھ ساؤتھ گیس ڈٹ انا زوت اڈتننگ نا خواہندار اُن۔ روسی وزیر خارجہ پارے کہ پاکستان وروس انا نیام اٹ ہڑتوم آ کنڈآتا واپار اٹی پین ودکی نا گرج ءِ۔
