اسپیکر قومی اسمبلی تون بلوچستان اسمبلی نا ڈپٹی اسپیکر نا اوڑدہی، سیاسی و زرگزرانی حالیت و ایلو باندات آتیا گپ وتران

اسلام آباد۔ 07اپریل (اے پی پی) اسپیکر قومی اسمبلی اسد قیصر تون بلوچستان اسمبلی نا ڈپٹی اسپیکر سرداربابر خان موسیٰ خیل چارشنبے نادے آ داڑے اوڑدہی کرے ہراٹی جم سیاسی و زرگزرانی حالیت آتون اوار دورہ اوغانستان و بلوچستان نا امور آ گپ وتران کننگا۔ اسپیکر قومی اسمبلی گپ وتران کرسا پارے کہ صوبہ بلوچستان نا الس نا شونداری و شونہالی ساڑی حکومت نا اولیت آتا اہم جزو ءِ۔ بلوچستان نا الس نا احساس محرومی تا زالہ وزیراعظم عمران خان نا ویژن ءِ۔ اوپارے کہ قومی اسمبلی ٹی صوبہ بلوچستان آن تعلق تخوک آ قومی اسمبلی نا باسک آتے بلوچستان نا الس نا پبی وڑاٹ نمائندگی ءِ کننگ نا موقع تننگک۔ صوبہ بلوچستان نا شونداری و شونہالی مچ آ ملک انا زرگزرانی سوگوی ءِ پک کیک۔ سی پیک ڈٹ ملک انا شونداری و شونہالی کن گیم چینجر نا حیثیت تخک۔ گوادر پورٹ صوبہ بلوچستان نا شونداری و شونہالی نا مرکز مریک۔ اسپیکر قومی اسمبلی پارے کہ صوبہ بلوچستان اٹی سی پیک نا رداٹ برجاڈٹ آتا زوت پوروی آن صوبہ نا الس نا زند انا آب گچین مریک۔ السی نمائندہ غاک تینا لائخی تے کاریم اٹ اتسا الس نا زنداٹی جوان ءُ بدلی اس اتنگ کیرہ۔ ڈپٹی اسپیکر بلوچستان اسمبلی بابر خان موسیٰ خیل اسپیکر نا بلوچستان نا شونداری و الس نا شونہالی نا جوزہ غاتا ستاءِ کرے وپارے کہ صوبہ بلوچستان اٹی سی پیک نا رداٹ برجاڈٹ آتا زوت پوروی صوبہ نا شونداری و شونہالی نا ضامن ءِ۔ بنجائی حکومت ناصوبہ بلوچستان اٹی برجاشونداری ڈٹ آتیٹی است خواہی ستاکڑزک۔