اسلام آباد۔ 07اپریل (اے پی پی) پاکستان و روس انا نیام اٹ ڈل آتا کہول آ مذاکرات چارشنبے نادے آ وزارت خارجہ ٹی اڈ ہلک۔ اقتصادی، واپاری، توانائی و دفاعی کمکاری نا مون آ دننگ تون اوار تین پہ تینی است خواہی نا بشخ آتیٹی ہڑتوم آ کنڈآتا کمکاری ءِ ودفنگ نا عزم انا درشانی ءِ کننگا۔ پاکستانی ڈل انا کماشی ءِ وزیر خارجہ مخدوم شاہ محمود قریشی وخت اس کہ روسی ڈل انا کماشی ءِ روسی وزیر خارجہ سرگئی لاروف کریکہ۔ مخدوم شاہ محمود قریشی کورونا دین انا جہانی دین اٹی روس اٹی مروک آ جانی نسخان آ است ہسونی نا درشانی ءِ کرے و پارے کہ کنے خوشی ءِ کہ ہرانرزوری اٹ روس دا جہانی دین انا چیلنج تون مون تس او ستاکڑزک۔ پاکستان تون اوار دنیا نا بھاز انگا ملک آک روسی کورونا ویکسین ”سپٹنک5“ آن فائدہ ہرفنگ ءُ۔ شاہ محمود قریشی پارے کہ وزیراعظم عمران خان و صدر پیوٹن نا نیام اٹ پدریسہ رابطہ، ہڑتوم آ کنڈآتا تعلقداری نا سوگوی نا درشانی ءِ۔ پاکستان، تینا جغرافیائی سیاسی اولیت آتے جغرافیائی زرگزرانی اولیت آتے ٹی بدل کرینے۔ وزیر خارجہ ماسکو شنگھائی کمکار تنظیم نا وزرائے خارجہ کونسل نا دیوان نا وخت آ روسی وزیر خارجہ تون مروک آ اوڑدہی و کثیر الجہتی بشخ آتے ٹی ہڑتوم آ کنڈآتا کمکاری نا مون آ دننگ نا بابت مروک آ گپ وتران نا حوالہ ءِ ترسا پارے کہ پاکستان، روس اتون کثیر الجہتی بشخ آتے ٹی ہڑتوم آ کنڈآتا کمکاری ءِ ودفنگ کن سنبرینگوک ءِ، نن، پیشن نا زرکارآتے پاکستان اٹی زرکاری کن ای ویزہ تون اوار بھازآسراتی تننگ اُن۔ مذاکرات اٹی اقتصادی، واپاری و دفاعی کمکاری نا مون آ دننگ نا بابت سرجم گپ وتران مس۔ پاکستان و روس انا نیام اٹ اقتصادی کمکاری نا مون آ دننگ نا بابت”بین الحکومتی کمیشن“ نا بروک آ دیوان نا زوت اڈتننگ آ امنا کننگا۔ شاہ محمود قریشی پارے کہ پاکستان، روس انا شریداری اٹ ”سٹریم گیس پیپ لین ڈٹ“ انا زوت بناءِ کننگ کن سنبرینگوک ء،۔ پاکستان، اوغانستان اٹی امن تون اوار ڈیہہ ٹی امن کن تینا خیرخواہی کڑد ءِ سفاانگا نیت اٹ ادار کرسا بننگ ءِ۔ وزیر خارجہ اوغانستان اٹی امن نا بابت روس انا کوشست آتا ستاءِ کرے وپارے کہ اوغان امن عمل نا بابت، تدوک آ تُو ماسکو ٹی وسیع سہ باسکی دیوان نا اڈتننگ ستاکڑزک۔ شاہ محمود قریشی پارے کہ دوشنبے ٹی ہارٹ آف ایشیااستنبول پراسس دیوان نا وخت آ کنا ایمبیسڈر ضمیر کابلوف تون اوغانستان اٹی امن نا بابت سرجم گپ وتران مس۔ وزیر خارجہ روسی ہم منصب ءِ مقبوضہ جموں و کشمیر اٹی برجا انسانی حق انا بھلا خلاف ورزی و علاقائی امن ءِ مون تروک خطرہ غاتیان معلومدار کرے۔ اوپارے کہ پاکستان ڈیہہ ٹی امن نا خواہندار ءِ و کشمیر نا ویل اتون اوار غٹ جھیڑہ غاتا پرامن ایسری نا مخ تف ءِ۔ شنگھائی کمکار تنظیم تون اوار اہم علاقائی فورم تیا پاکستان و روس انا نیام اٹ کمکاری، ہڑتوم آ کنڈآتا تعلقداری نا مون آ دننگ نا سوب ءِ۔ روسی وزیر خارجہ جم وجوش اٹ بخیر کننگ آ وزیر خارجہ مخدوم شاہ محمود قریشی نا منت واری ءِ ہرفسا ہڑتوم آ کنڈآتا اقتصادی، واپاری ودفاعی کمکاری نا مون آ دننگ تون اوار تین پہ تینی است خواہی نا بشخ آتے ٹی ہڑتوم آ کنڈآتا کمکاری ءِ ودفنگ نا عزم انا درشانی ءِ کرے۔
