حیدرآباد۔ 07اپریل (اے پی پی) وزیر پاکستان ریلوائی محمد اعظم سواتی پارینے کہ ریلوائی نا بحالی و ایل ایم ون ڈٹ زرگزران نا رخ ءِ بدل کیک، وزیراعظم عمران خان ناپالیسی نار داٹ ریلوائی ءِ زوت کٹیائی، آسراتی تیان پُرو رکھوک سفر نا ذریعہ جوڑ کینہ، پشاورآن کابل و ازبکستان ٹرین چلینگک، ورلڈ بینک 4,8بلین نا وام منظور کرینے، فریٹ ٹرین ڈٹ آ کاریم ترند ءِ پوریاگر تے آسراتی و پت ایتنہ، داخیال آتا درشانی ءِ او حیدر آباد ریلوائی اسٹیشن نا معائنہ غان پد میڈیا نا نمائندہ غاتون گپ وتران کرسا پارے۔ داوخت آ ڈویژنل سپرنٹنڈنٹ ریلوائی کراچی محمد حنیف گل، ڈویژنل انجینئر کامران احمد غوری وایلو آفیسر آک ہم ساڑی ئسر۔ اوپارے کہ وزیراعظم عمران خان نا پالیسی ءِ کہ ملک ءِ شون تننگے و مواصلات و سفر نا نظام ءِ گچین آن گچین کننگے ریلوائی نا نظام انگریز نا دوراٹی جوڑ مسوسس ولے اوکان پد فنڈتو جتا مرسا کرے ولے آب اٹ و پائیدار کاریم متو کرپشن بھسکاری نا دنگ آ ایس سلفیتے، ریلوائی نصف صدی ٹی 1,2ٹریلین آن زیات نسخان ہرفینے، پی آئی اے، او جی ڈی سی و پاکستان اسٹیل آنبار داڑے ہم سیاسی بھرتی مس و ادارہ بھسکاری نا دنگ اسکان سرمس ولے داسہ وزیراعظم عمران خان نا عزم ءِ کہ اودے بدل کننگے و ملک ءِ کرپشن و بدعنوانی آن آجو کرسا شونداری نا کسر آ اتنگے کنے یخین ءِ کہ وزیراعظم نا پالیسی نا رداٹ نن زوت پاکستان ریلوائی ءِ تنکی تیان کشنہ و اودے کٹیائی، آسراتی تیان شپ و رکھوک سفر و ترسیل نا ذریعہ جوڑ کینہ۔ اوپارے کہ پشاور آن کابل و ازبکستان اسکان مال بردار و مسافر ٹرین چلینگک دا چرجوئی ٹی معاہدہ مسنے و ورلڈ بینک ہم 4,8بلین نا وام منظور کرینے، ولے ایران و ترکی اسکان ٹرین نا بابت ہرالاپرواہی تے کننگا اونا زموار آتے سزا ملانے و ایلوفتے ملک اوپارے کہ ایم ایل ون ڈٹ زرگزران نا رخ ءِ بدل کیک داڑآ ترندی اٹ کاریم مننگ ءِ ولے داکان مست نن فریٹ ٹرین آ کاریم کننگ اُن سکھر ڈویژن اٹ زیات شکست مریک ہموجاگہ نا ٹریک ءِ تینا کمک تینٹ نا رداٹ گچین وپائیدار جوڑ کننگ انگ ءِ، 4ہزار مزور دے و نن کاریم کننگ ءُ ننے فنڈ آتا کمتی اف ننا چکار سیفٹی ءِ انسانی جان نا بھلو قیمت اسے دانا ننے احساس ارے داٹی ڈیوالئی ءِ سگنگ پننگک و ہرکس کہ ڈیوالئی نا زموار مس اودے سخت سزا تننگک۔ اوپارے کہ نم خنرے کہ 30دے اٹی 2آن 3 ہنداخہ پین زیات فریٹ مریک ایم ایل ون اٹ مننگ کیک مسہ مسہ تُو ہرے مرے ولے بزنس مین نا پت و اودے گچین ءُ بزنس اس تننگ کن نن فریٹ ٹرین اوفتے ایتنہ ہراننتون کاروبار کیک نن ہروڑنا آسراتی، پت و آجوچاگڑد اس اوفتے ایتنہ و ریلوائی ءِ کٹیائی کینہ دانا فزیبلٹی اس تیار کننگانے ای یخین اٹ پاوہ کہ 6آن 9 تُو اٹی نن ریلوائی ءِ کٹیائی کینہ کنتون آزموندہ ئی ٹیم اس ارے اوفتا کمک اٹ نن دُزی و کرپشن ءِ چٹفنہ۔ اسہ سوج اسے نا ورندی ٹی اوپارے کہ کوویڈ۔ 19آن زرگزران ءِ بھاز نسخان رسینگانے ولے ایلو سفرآتیان بیدس ریلوائی کوویڈ نا بابت زیات رکھوک ءِ۔ داکان بیدس وزیر ریلوائی حیدر آباد و کوٹری ٹی ریلوائی نا چندی دفتر، ورکشاپ، سلیپر فیکٹری تا معائنہءِ کرے و ہراڑے تجاوزات جوڑ ءِ اوفتا ہم جاچ ءِ ہلک و پارے کہ زوت داڑآ حکمت عملی اس جوڑ کینہ۔ اوحیدر آباد اٹی گچین مروک نمائندہ و پوریاگر آتیان ہم ریلوائی نا امور آ گپ وتران کرے۔
