وزیراعظم عمران خان نا کماشی ٹی دیوان اٹی گوجرانوالا ڈویلپمنٹ پلان، راولپنڈی اربن ریجنریشن، نالہ لئی ایکسپریس وے ڈٹ آتیا سرجم حوال، حکومت نا غٹ تر چکار ایس ایم ایزءِ گچین وارخواہی فراوان کننگ آٹے، وزیراعظم

اسلام آباد۔ 06اپریل (اے پی پی) وزیراعظم عمران خان پارینے کہ حکومت نا غٹ ترچکار سمال اینڈ میڈیم انٹرپرائزءِ کاروبار کن گچین ءُ وارخواہی اس فراوان کننگ آٹے، گوجرانوالہ ڈویژن اٹی دابابت بے پناہ وارخواہی ارے، بنجائی حکومت علاقائی زرگزرانی شونداری نا بابت ہروڑکمک فراوان کیک، نالہ لئی ایکسپریس وے و راولپنڈی اربن ریجنریشن ڈٹ آتیان شار انا ویل آتا ایسر اٹ کمک رسینگک و زرگزرانی سرجزآتے مون آ دننگ دوئی مریک۔ داخیال آتا درشانی ءِ او سے شنبے نادے آ تینا کماشی ٹی صوبہ پنجاب اٹی علاقائی زرگزرانی شونداری نا حکمت عملی نا رداٹ گوجرانوالہ ڈویلپمنٹ پلان و راولپنڈی اربن ریجنریشن و نالہ لئی ایکسپریس وے ڈٹ انا بابت دیوان آن تران کرسا کرے۔ دیوان اٹی وزیراعلیٰ پنجاب سردار عثمان بزدار، سلاہکار وزیراعلیٰ ڈاکٹر سلمان شاہ، چیف سیکرٹری پنجاب و صوبہ نا سینئر کمامدارآک ویڈیو لنک انا کمک اٹ بشخ ہلکر۔ نالہ لئی ڈٹ انا بابت دیوان اٹی وزیر داخلہ شیخ رشید ہم ساڑی ئس۔ سلاہکار وزیراعلیٰ پنجاب ڈاکٹر سلمان شاہ وزیراعظم ءِ صوبہ پنجاب نا چندی ڈویژن تا شونداری نا بابت حکمت عملی نا بابت بریف کرے۔ دارداٹ اینو نا دیوان اٹی گوجرانوالہ ڈویلپمنٹ پلان آ گپ وتران کننگا۔ علاقائی زرگزرانی شونداری نا حکمت عملی نا رداٹ چندی زرگزرانی بشخ آتے ٹی تعلقدار علاقہ غاتے ٹی مروک آ وارخواہی تے کاریم اٹ اتسا دا علاقہ نا شونداری و ملکی پیدوار اٹی اونا بشخ ءِ ودفنگ آ چکار کننگ انگ ءِ۔ گوجرانوالا ڈویلپمنٹ پلان نا بابت حوال اٹی گوجرانوالا ڈویژن نا بابت غٹ زرگزرانی حقائق و محرکات آتیا سرجم گپ وتران کننگا۔ دیوان ءِ پاننگاکہ گوجرانوالا ڈویژن داوخت آ ملکی پیدوار (جی ڈی پی) ٹی سینزدہ درسد، برآمد آتے ٹی بیست درسد وخت اس کہ پیشن نا ملک آن ترسیلات زر انا رداٹ کم و ود چِل درسد بشخ شاغنگ ءِ۔ گوجرانوالا ڈویلپمنٹ پلان نا رداٹ داعلاقہ نا کشت وکشار، مینو فیکچرنگ و سروسز سیکٹر نا بشخ آتیا خاص چکار کننگک تانکہ گوجرانوالا ڈویژن نا پوٹینشل ءِ پورو وڑاٹ کاریم اٹ اتنگ مرے۔ دابابت متعین کروک ہر اولیتی بشخ انا مون آ دننگ نا بابت اختیار کروک سلاہ ئی حکمت عملی آ سرجم حوال تننگا۔ ڈویلپمنٹ پلان نا رداٹ دہ بشخ آتیا خاص چکار کننگک ہرافتے ٹی نالج و ٹیکنالوجی ٹرانسفر، اسپیشلائز ڈویلیوچین انفراسٹرکچر، افرادی قوت نا ڈویلپمنٹ، کلسٹر سپورٹ سسٹم، اڑزآن توانائی، مواصلات، اربن مینجمنٹ، رورل اربن مارکیٹ نا گچین رابطہ، رورل ڈویلپمنٹ اینڈ مینجمنٹ، ماحولیات پین پین اوار ءُ۔ وزیراعظم مجوزہ پلان نا ستاءِ کرسا پارے کہ گوجرانوالا ڈویژن اٹ بے پناہ پوٹینشل ارے۔ اوسمال اینڈ میڈیم انڈسٹری ٹی مروک آ پوٹینشل نا خاص وڑاٹ ذکر ءِ کرسا پارے کہ حکومت نا غٹ تر چکار ایس ایم ایز ءِ کاروبار کن گچین ءُ وارخواہی اس فراوان کننگ آٹے تانکہ ایس ایم ایز ملکی زرگزران اٹ گچین کڑد ادا کننگ کے۔ وزیراعظم پارے کہ علاقائی شونداری نا حکمت عملی آ عملدرآمد نا بابت بنجائی حکومت ہروڑنا کمک فراوان کننگ کن سنبرینگوک ءِ۔ وزیراعظم پارت کرے کہ گوجرانوالا ڈویلپمنٹ پلان نا بابت ٹائم لائنز آ مبنی ہدف آتا تعین ءِ کرسا اوفتا پدریسہ مانیٹرنگ ءِ پک کننگے۔ اوکان پد وزیراعظم ءِ نالہ لئی ایکسپریس وے ڈٹ و دارداٹ نالہ لئی نا چارمہ کنڈ واقع ڈغار نا گچین کاریم اٹ اتنگ، ڈٹ انا زرگزرانی بھرم و ایلو پلو آتیا سرجم حوال تننگا۔ ڈٹ اتون گنڈوک زوننگ و ریگولیشنز نا بابت داتم اسکان نا پیش رفت آ وزیراعظم ءِ حوال تننگا۔ ڈٹ آ جوڑ مروک آ انٹرچینجز، و ریمپ انٹرسیکشن آ اسپیشلائزڈ زون تا جوڑ کننگ نا بابت ہم حوال تننگا۔ وزیراعظم ءِ پاننگا کہ زوننگ نا بابت اولیکو ریسہ نا بناءِ جون انا نیمہ غان کننگک۔ وزیراعظم راولپنڈی اربن ریجنریشن و نالہ لئی ایکسپریس وے ڈٹ آ ہیت کرسا پارے کہ دا ڈٹ ہراڑے راولپنڈی شار انا ٹرانسفارمیشن اٹ کلیدی کڑد ادا کیک ہموڑے داڑآن شار انا ویل آتا ایسر و زرگزرانی سرجزودی مریک۔ وزیراعظم پارت کرے کہ ڈٹ آ مقرر کروک ٹائم لائن تیا عملدرآمد نا بابت خاص چکار کننگے تانکہ داڈٹ ءِوخت آ ایسر اسکان سرکننگ مرے۔