اسلام آباد۔ 06اپریل (اے پی پی) اسپیکر قومی اسمبلی اسد قیصر تون بنجائی وزیر سائنس اینڈ ٹیکنالوجی فواد چوہدری سے شنبے نادے آ اسپیکر ہاؤس اٹی اوڑدہی کرے ہراٹی گچین کاری اصلاحات و جوڈیشل ریفارم تیا گپ وتران کننگا۔ اسپیکر فواد چوہدری تون گپ وتران کرسا پارے کہ پارلیمنٹ اٹ ساڑی غٹ سیاسی جماعت آتے گچین کاری اصلاحات و جوڈیشل ریفارم تیٹی تینا سلاہ تننگ نا گرج ءِ، کانود جوڑ کننگ و گچین کاری اصلاحات نا عمل اٹ اپوزیشن جماعت آتا سلاہ اہمیت تخک۔ اپوزیشن ءِ قومی اہمیت نا حامل اہم باندات آتیا سرجم شرہ نا موقع اس فراوان کننگک۔ ملک انا غٹ اہم ویل آتیا سازگار ایوان اٹ سرجم شرہ نا گرج ءِ۔ پارلیمنٹ اٹ ساڑی غٹ سیاسی جماعت آتے ملک و قوم انا خاطر تینا سیاسی تعلقداری تیان ایڑتر مرسا کڑد ادا کننگ نا گرج ءِ۔ اختلاف رائے جمہوریت نا حسن ءِ ولے ملکی فائدہ غاتا خاطر اسہ ایلو نا اختلاف آتے گیرام کرسا مون آ ہنوئی مریک۔ اسپیکر قومی اسمبلی پارے کہ الس نا خنک پارلیمنٹ آٹی ءُ گچین کاری عمل نا شفافیت آن الس نا پت اٹی ودکی مریک۔ وزیر سائنس و ٹیکنالوجی فواد چوہدری اسپیکر قومی اسمبلی اسد قیصر نا پارلیمانی کہول آ کانود جوڑ کننگ نا عمل ءِ ترند کننگ نا کوشست آتا ستاءِ کرے و پارے کہ اپوزیشن ءِ کانود جوڑ کننگ و گچین کاری اصلاحات نا عمل اٹ کڑد ادا کننگ نا گرج ءِ ملک اٹی قومی اہمیت تخوک باندات آتے ہیت وگپ انا کمک اٹ ایسر کننگ حکومت و اپوزیشن نا اسیجائی زمواری ءِ۔
