اسلام آباد۔ 06اپریل (اے پی پی) وزیر خارجہ مخدوم شاہ محمود قریشی پارینے کہ کس اس سویلی پنجاب نا وتواجہی آ نقب خلنگ ناکوشست کرے تو اودے سویلی پنجاب نا سیاسی کارندہ غاتون اوار اوار چار کروڑ باتی تا کنڈآن مزاحمت تون مون تروئی تمک۔ 30مارچ انا نوٹیفکیشنیقینا اسہ سازش اس ئس، نن سویلی پنجاب اٹی واکداری تا پورو گدریفنگ ءِ پک کینہ۔ او سے شنبے نادے آ ویڈیو لنک انا کمک اٹ سویلی پنجاب نا انتظامی امور نا بابت اڈ ہلوک آ دیوان آن تران کریکہ۔ وزیر خزانہ پنجاب مخدوم ہاشم جواں بخت وزیرخارجہ ءِ دیوان اٹی بشخ ہلنگ آ بخیر اٹ پارے وخت اس کہ ایڈیشنل چیف سیکرٹری پنجاب دیوان اٹی بشخ ہلوک آتے سویلی پنجاب سیکرٹریٹ نا انتظامی امور نا بابت سرجم حوال تس۔ وزیر خارجہ دیوان اٹی بشخ ہلوک آتیان تران کرسا پارے کہ سویلی پنجاب نا تہہ ٹی ودوک آ احساس محرومی تا چٹفنگ کن وزیراعظم عمران خان کناسلابت آن پد سویلی صوبہ نا خواست آتے تحریک انصاف نا منشور اٹی اوار کرے۔ سویلی پنجاب نا خواست ءِ لسانییا سیاسی بنداو تیا آخا بلکن بیرہ انتظامی بنداو تیا کننگا۔ سویلی پنجاب ءِ واکداری تا گدریفنگ کن نن بھلو جہد اس کرین۔ شاہ محمود قریشی پارے کہ سویلی پنجاب نا الس ننے مینڈیٹ تسنے۔ 30مارچ انا نوٹیفکیشنیقینا اسہ سازش اس ئس۔ مہالو ہم سویلی پنجاب نا سیکرٹریٹ نا جوڑ کننگ نا بابت اڑنگ شاغنگ نا کوشست کننگا۔ نن سویلی پنجاب اٹی واکداری تا پورو گدریفنگ ءِ پک کینہ۔ وزیر خارجہ پارے کہ است ہسونی نا سوب دادے کہ اینخو مالی سال ایسر مننگ والاءِ ولے سویلی پنجاب سیکرٹریٹ کن جتا کروک چار ارب روپئی نافنڈ ءِ داتم اسکان خڑچ کننگ نا ہچ ءُ حکمت عملی اس مون آ بننگ کتنے۔ بیوروکریسی ءِ سنجیدگی نا درشانی ءِ کروئی مریک۔ شاہ محمودقریشی پارے کہ اخس سیکرٹری و آئی جی سویلی پنجاب نا ضلع غاتا دورہ ءِ کریر؟ وزیراعلیٰ پنجاب عثمان بزدار ءِ اللہ تعالیٰ روشنا ءُ موقع اس تسنے کہ او وتواجہ سویلی پنجاب نا عمل ءِ پک کے۔ شاہ محمود قریشی پارے کہ ای سویلی پنجاب نا صوبائی اسمبلی نا باسک، صوبائی و بنجائی وزیر آتے مبارکبادی ایتیوہ کہ اوفک 30مارچ انا نوٹیفکیشن نا سازش ءِ بے سہب کریر۔ ای اینو دا پیدوار کننگ خواوہ کہ اگہ سویلی پنجاب نا وتواجہی ءِ لتاڑنگ نا کوشست کننگاتو نن آخیریکو حد اسکان کانہ۔ سویلی پنجاب صوبہ نا جوڑ کننگ کن آئینی ترمیم نا گرج ءِ و ننتون اِراتہائی اکثریت الوکہ۔ پیپلزپارٹی و مسلم لیگ نون سویلی پنجاب صوبہ نا جوڑ کننگ نا بابت الس تون قول کریر ولے وخت بننگ آ منافقی ءُ رویہ اس اختیار کریر۔ حکومت آک کارہ بریرہ ولے نن ہچ ءُ حالیت اسے ٹی سویلی پنجاب نا وتواجہی آ آنچ بننگ کن الیپنہ۔ شاہ محمو دقریشی پارے کہ ای پیدوار کننگ خواوہ کہ اگہ کس اس سویلی پنجاب نا وتواجہی آ نقب خلنگ نا کوشست کرے تو اودے سویلی پنجاب نا سیاسی کارندہ غاتون اوار اوار چار کروڑ باتی تا کنڈآن مزاحمت تون مون تروئی تمک۔ انشاء اللہ وزیراعظم عمران خان لاہور آ بریک و سویلی پنجاب نا 33 پارلیمنٹ نا باسک دادیوان اٹی شریک مریرہ۔
