اسلام آباد۔ 06اپریل (اے پی پی) بنجائی وزیر خزانہ، محصولات و صنعت و پیدوار محمد حماد اظہر پارینے کہ تنخواہ و پنشن نا بشخنگ نا ساڑی آ ماڈل پائیدار اف و تنخواہ، پنشن، الاؤنسز و آسراتی تے ساف جوڑ کننگ کن بے وڑی تے مُر کننگ المی ءِ، بنجائی و صوبائی ملازم آتے کمیشن نا سلاہ و سوج آتون بھلواومیت اس وابستہ ءِ۔ داہیت ءِ او سے شنبے نادے آ داڑے پے اینڈ پنشن کمیشن نا چیئرپرسن نرگھس سیٹھی تون اوڑدہی ٹی پارے۔ داوخت آ سیکرٹری خزانہ ہم ساڑی ئس۔ پے اینڈ پنشن کمیشن نا چیئرپرسن نرگھس سیٹھی بنجائی وزیر ءِ تنخواہ و پنشن نا ساڑیآ ساخت ءِ مرکزی دنگ اٹ اتنگ کن کمیشن نا مینڈیٹ نا رداٹ وڑوڈول انا بارواٹ حوال تس۔ اووزیر خزانہ ءِ پارے کہ تنخواہ و پنشن نا زرتس اکن مالیاتی وڑاٹ جوان ءُ ایسر اسے کن غٹ اسٹیک ہولڈر آتون سلابتی عمل برجاءِ۔ اوپارے کہ تنخواہ و پنشن نا ساڑی آ نظام ملکی زرگزران آاسہ بھلو بھاریم اسے۔ وزیر خزانہ داہیت آ زور شاغسا پارے کہ تنخواہ و پنشن نا تقسیم نا ساڑی آ ماڈل پائیدار اف و تنخواہ، پنشن، الاؤنسز وآسراتی تے معقول جوڑ کننگ کن بے ڈولی تے مرکننگ المی ءِ تانکہ دا نظام ءِ ساف کننگ مرے۔ اودارداٹ شفاف، عمل نا قابل و پائیدار بنداو تیا چلینگوک آ ماڈل نا گرج آ زور شاغا۔ اوپے اینڈ کمیشن ءِ پورو کمک نا باور کرفے۔ نرگھس سیٹھی وزیر خزانہ ءِ پارے کہ مچ آ ملک اٹی تنخواہ و پنشن نا نظامءِ اسہ وڑ جوڑ کننگ کن ذیلی کمیٹی تے ٹرمز آف ریفرنس اتون کاریم کننگ نا زمواری ءِ تننگانے، دا کمیٹیک دارداٹ چندی سلاہ و سلاہ و سوج آتا جاچ ءِ ہلنگ ءُ۔ وزیر خزانہ پارے کہ پے اینڈ پنشن کمیشن نا مون آ اسہ مشکل ءُ ہدف اسے انتئے کہ بنجائی و صوبائی ملازم آتے کمیشن نا سلاہ و سوج آتون بھلو اومیت اس وابستہ ءِ۔
