اسلام آباد۔ 06اپریل (اے پی پی) بنجائی وزیر ڈٹ بندی شونداری و اصلاحات و خصوصی گام گیج اسد عمر پارینے کہ پاکستان اِراتُو اٹی 10 لکھ شاری تے کورونا دین آن بچفنگ ناویکسین خلکونے۔ سے شنبے نادے آ بنجائی وزیر اسد عمر ٹویٹ کرسا پارے کہ پاکستان اٹی کورونا نا مثبت کیس آتے ٹی بنداوی کمتی بننگ بناکرینے۔ بنجائی وزیر پارے کہ ودکی پابندی، مریس لاک ڈاؤن و سخت ایس اوپی تا سوب آن دا ممکن مسنے۔ تدوک آ 2ہفتہ غاتا سوب آن مرک آتا کچ اٹی منہ دے اکن ودکی ممکن ءِ۔ اسد عمر پارے کہ دین آن بچنگ کن شاریک ایس او پی تیا عمل کیر و رکھ مریر۔ اومستی پارے کہ داوخت آ ملک اٹی 10 لکھ آن زیات بندغ آتے دین آن بچفنگ نا ویکسین لگانے وخت اس کہ 76ہزار آن زیات بندغ آتے تدوک آ دے ویکسین خلنگا۔ اسد عمر پارے کہ ویکسین کن رجسٹرڈ مخلوق نا کچ 20لکھ آن زیات مسنے۔ 6لکھ ہیلتھ کیئر ورکرز و 50 سال آن زیات وئی نا 14لکھ شاری رجسٹرڈ مسنو۔ اوپارے کہ 50 سال آن زیات وئی نا شاریک تینے رجسٹرڈ کرفر۔
