اسلام آباد۔ 06اپریل (اے پی پی) اے لیول و اولیول نا امتحانک سخت ایس او پی تا رداٹ تینا تخوک آ وخت آ مریرہ وخت اس کہ کچی آن ہشت جماعت اسکان عئید اسکان اسکول آک بند مریرہ۔ سے شنبے نادے آ بنجائی وزیر تعلیم شفقت محمود نا کماشی ٹی بین الصوبائی وزرائے تعلیم و وزرائے جان جوڑی نا سلابتی دیوان اس مس۔ بنجائی وزیر تعلیمشفقت محمود دیوان آن پد میڈیاتون گپ وتران کرسا پارے کہ کورونا نا ساڑی حالیت آتے مون آ تخسا دا فیصلہ کننگانے کہ ہراضلع غاتیٹی دا دین انا تالانی زیات ءِ ہموڑے کچی آن ہشتم عئید اسکان اسکول آتے بند کننگک ولے 28اپریل آ دُوارہ حالیت آتا جاچ ءِ ہلنگ آن پد فیصلہ کننگک۔ ولے نہہ جماعت آن انٹر 19اپریل آن سخت ایس او پی تار داٹ ملنگک۔ ولے صوبائی حکومت آک دا دین انا زیات تالانی والا ضلع غاتا تعین ءِ تینٹ کیرہ۔ ہنداوڑاٹ اے لیول و اولیول نا امتحانک تخوک آ وخت آ ایس او پی تا رداٹ مریرہ داڑکن کیمبرج انتظامیہ حکومت پاکستان ءِ باورکرفینے کہ امتحان تیٹی کورونا نا بابت تروک آ ایس او پی تیا عملدرآمد ءِ پک کننگک۔ اومستی پارے کہ ہراضلع غاتے ٹی دا دین انا تالانی زیات ءِ ہموڑے غٹ یونیورسٹیک ہم بند مریرہ و تینا غٹ تر کلاس آتے آن لائن برجاتخنگ کیرہ ولے غٹ جامعہ غاتے دا سلاہ تننگانے کہ او تینا داخلہ نا امتحان تا تاریخ ءِ پد بٹر، وخت اس کہ ایچ ای سی و یونیورسٹی انتظامیہ دانا فیصلہ ءِ تین پہ تینی سلابت اٹ کیرہ۔ طالب علم آتے پارت کننگانے کہ او تینا غٹ تر چکار ءِ امتحان تا تیاری تیا کیر و ہروڑنا گمراہ کن معلومداری تیا چکار کپس۔ اومستی پارے کہ داوخت آ دنیا نا 80 درسد ملک آتے ٹی امتحانک مننگ ءُ وخت اس کہ ڈیہہ ٹی بیدس بنگلہ دیش آن سری لنکا، بھارت تون اوار غٹ ملک آتیٹی امتحانک برجاءُ۔
